Թուրքիան համարժեք պատասխան կտա Լիբիայում իր դիվանագիտական ներկայացուցչությունները գնդակոծելու դեպքում, ասվում է երկրի ԱԳՆ հայտարարության մեջ:
Ուրբաթ օրը Իտալիան դատապարտել է հարձակումը, որի թիրախը Տրիպոլիում Իտալիայի և Թուրքիայի դեսպանների նստավայրերի մոտ գտնվող գոտին էր: Իտալիայի ԱԳՆ-ն հանձակման մեջ մեղադրել է Խալիֆա Հաֆթարի Լիբիայի ազգային բանակին (LNA) և հայտարարել առնվազն երկու մարդու մահվան մասին:
«Լիբիայում վերջին օրերին Հաֆթարի հետ կապված անօրինական կազմավորումները ուժեղացրել են հարձակումները խաղաղ բնակչության և քաղաքացիական ենթակառուցվածքների վրա, հատկապես Տրիպոլիում: Միայն մայիսի 9-ին նրանք արձակել են ավելի քան 100 հրթիռ, ինչպես նաև հրետանային կրակ են բացել Տրիպոլիի կենտրոնում գտնվող բնակելի թաղամասերի ուղղությամբ», ասվում է Թուրքիայի արտգործնախարարության հայտարարության մեջ:
Գերատեսչությունը պնդում է, որ հարձակումների նպատակը, որի ժամանակ մարդիկ են զոհվել և վիրավորվել, եղել են դիվանագիտական ներկայացուցչությունները, այդ թվում՝ Թուրքիայի դեսպանատունը, օդանավակայանը և քաղաքացիական այլ ենթակառուցվածքներ: Թուրքիայի արտգործնախարարությունն այդ հարձակումը որպես պատերազմական հանցագործություն է որակել:
