Սահմանադրական կարգի ենթադրյալ տապալման գործով դատական նիստին ՀՀ երկրորդ նախագահ Ռոբերտ Քոչարյանն անդրադարձավ նիստի ընթացքում իր հասցեին հնչեցված մի քանի մեղադրանքների:
Նա նշեց, որ իրեն փորձեցին մեղադրել այն բանի համար, որ նույնիսկ կալանավորված վիճակում սենյակից դուրս է հանել քրեակատարողական հիմնարկի աշխատողներին: Նա նշեց, որ սա այն նույն դեպքն է, երբ մարդն ընդհանրապես չհասկանալով ինչի մասին է խոսքը՝ իրեն իրավունք է վերապահում նման կարգի մեղադրանք ուղղել իր հասցեին:
«Այո՛, այդպիսի դեպք եղել է: Ես բժիշկների հետ նստած քննարկում էի վիրահատությունն ինչպես պետք է արվի, և քրեակատարողական վարչությունից մի բարձրաստիճան սպա նստել ասում է՝ ես էլ պետք է մասնակցեմ: Հարցնում եմ՝ Դուք բժի՞շկ եք, ասում է՝ ոչ: Ասում եմ՝ որպես ո՞վ եք մանսակցում այն հանդիպմանը, թե ինչպես ինձ պետք է վիրահատեն: Ասում է՝ չէ, ես պետք է մասնակցեմ: Ասել եմ՝ խնդրում եմ զանգեք Մարդու իրավունքների պաշտպանին, ասել է՝ չեմ զանգում, ասում եմ՝ ես հեռախոս չունեմ ինձ զրկել են կապի հնարավորությունից: Վերջը, այլ ելք չկար, ասացի ես հրաժարվում եմ այս բուժումից, ինձ հետ տարեք քրեակատարողական հիմնարկ, որովհետև Դուք իրավունք չունեք ներկա գտնվելու նման խոսակցության»,- պատմեց Քոչարյանը: