Ինչպես նշեց ԱԺ պատգամավոր Մխիթար Հայրապետյանը, ինքը և իր գործընկերներ Վահագն Թևոսյանը և Արման Բաբաջանյանը շրջանառության մեջ են դրել «Տեսալսողական մեդիայի մասին» օրենքի նախագիծը: «Հեռուստատեսության և ռադիոյի մասին գործող օրենքն այլևս հնացած է և ունակ չէ լուծելու հետուստաեթերի և դրա բովանդակության առջև ծառացած նոր մարտահրավերները»,- նշեց նա:
Մխիթար Հայրապետյանի խոսքով՝ նոր օրենքը թույլ կտա վերահսկելու մեդիադաշտը և խաղի նոր ու արդար կանոններ հաստատելու բոլոր կողմերի համար:
«Այս օրենքով կարգավորման ենթակա չեն որևէ մեդիածառայություն կամ զանգվածային լրատվամիջոց, որը տալիս է վիդեոարտադրանք, բայց օգտվում է ինտերնետ հոսթինգների ծառայությունից: Կարգավորվում են այն ենթակառուցվածքները, որոնցով հեռարձակվում են մեդիածառայությունները՝ ուղիղ կապ հաստատելով հանրության հետ»,- նշեց Վահագն Թևոսյանը:
«Մենք որևէ հաղորդում, հաղորդաշար, առավել ևս որևէ հեռուստաալիք փակելու խնդիր մեր առջև չենք դրել: Մեր խնդիրն է սահմանել խաղի նոր և առողջ կանոններ, որին ստիպված կլինեն հետևել շատ հաղորդումներ, հաղորդաշարեր և հեռուստաալիքներ»,- հավելեց Հայրապետյանը:
Արման Բաբաջանյանն էլ նկատեց, որ օրինագիծը մեր երկրի համար ունի ազգային անվտանգության կարևորություն՝ և՛ ներքին, և՛ արտաքին իմաստով. «Սա մեր հասարակության դիմադրողունակությունը ամրապնդող նախաձեռնություն է»:
Մանրամասն՝ տեսանյութում:
