Քաղաքական թափթփուկները այստեղ որեւէ մեկի պաշտպանության կարիքը չունեն, իրենք ավելի շատ իրավաբանների պաշտպանության կարիքն ունեն, որ ճաղերի հետեւում չփտեն: Այս մասին, այսօր՝ ապրիլի 28-ին, Երեւանի ավագանու նիստում հարցուպատասխանի ժամանակ նշեց «Իմ քայլը» խմբակցության անդամ Գրիգորի Երիցյանը:
«Հետո այս շենքում շատ ավելի վատ արտահայտություններ են հնչել, իսկ թե ում փոխարեն է եկել իմ մյուս գործընկերը, բոլորս շատ լավ գիտենք: Եկել է մեր մեկ ուրիշ գործընկերոջ փոխարեն, ով իր սխալն ընդունել է եւ մանդատը դրել ու դուրս է եկել: Դուք երբեէ տեսե՞լ էիք, որ մարդը ֆեյսբուքյան գրառման համար մանդատը դնի: Էդ ձեր նշած թափթփուկները էս դահլիճում մարդ էին քացու տակ գցում, ընտրություն էին կեղծում, ցուցարար էին ծեծում, ու շարունակում էին մնալ իրենց պաշտոններում: Ու հիմա ասում եք՝ եկեք իրենց ներենք: Էնքան ենք ներել, իրենց արմատներն այնքան խորն են գցել, որ այսօր մեկ էլ հոպ, Աջափնյակի թաղապետարանում իրենց արմատներից էլի բուսնում են: Ինչի էս շենքում իրենց արմատները չկա՞ն: Մենք ոչ ոքի չենք ներելու: Ինչի՞ համար ներենք, որ մեր կյանքի լավագույն տարիները խլել են, որ մենք փողոցում պայքարել ենք իրենցից ազատվելու համա՞ր, թե՞ նրա համար, որ երկիրը ներքաշել են այնպիսի խնդիրների մեջ, որ մինչեւ հիմա չենք կարողանում դուրս գալ»,-ասաց նա:
