«Հանրակրթական ուսումնական հաստատություններում, քոլեջներում ավարատական քննություններ չեն իրականացվի: Այս մասին հայտարարել է ԿԳՄՍ նախարար Արայիկ Հարությունյանը: Կրթական մի աստիճանից մյուսը տեղափոխվելու քննություններ չեն իրականացվելու 4-րդ և 9-րդ դասարանների ավարտին։ Աշակերտների՝ մինչև մարտի 13-ն ունեցած և էլեկտրոնային մատյան փոխանցած գնահատականների հիման վրա կամփոփվեն նրանց տարեկան գնահատականները, և աշակերտները կփոխադրվեն հաջորդ աստիճան: Փոխադրական քննություններ չեն իրականացվի նաև ավագ դպրոցի 10-րդ և 11-րդ, դասարաններում, ամփոփումը տեղի կունենում նույն մեթոդով: 12-րդ դասարանում նույնպես չեն իրականացվի ավարտական քննություններ:
Թեմայի շուրջ «Առաջին լրատվական»-ը զրուցել է ԿԳՄՍ փոխնախարար Ժաննա Անդրեասյանի հետ: ԿԳՄՍ փոխնախարարի դիտարկմամբ՝ կորոնավիրուսը կրթական համակարգը ռենտգենի ենթարկեց. բացահայտվեցին մի շարք խնդիրներ:
«Աշակերտների 15-20 տոկոսը խնդիրներ է ունեցել՝ կապված հեռավար ուսուցման կազմակերպման հետ, և նախարարությունը որոշեց սահմանափակվել մինչև այս տարվա մարտի 13-ն ունեցած գնահատականներով և դրա հիման վրա իրականացնել տարվա ամփոփումները: Եթե որևէ երեխա երկրորդ կիսամյակում գնահատական չի ունեցել, տարեկան գնահատականի ամփոփման համար կարող է հիմք ծառայել առաջին կիսամյակի գնահատականը: Ըստ այդմ՝ 4-10 գնահատականներ ստացած աշակերտները կփոխադրվեն հաջորդ դասարան: Անբավարար գնահատականներ ունեցող երեխաների համար ուսուցիչները կկազմեն անհատական ուսուցման պլան՝ ելնելով այն ծավալից, որը բաց է թողնված, և հեռավար քննության միջոցով կկարողանան գնահատել այդ աշակերտներին՝ անկախ նրանից, թե քանի առարկայի պարագայում են ունեցել այդ խնդիրը»,- նշեց փոխնախարարը՝ վստահեցնելով, որ այս որոշումները կայացվել են՝ ելնելով աշակերտների շահերից:
«Փոփոխությունները պետք է դիտարկել որպես հնարավորություն դպրոցներում առկա խնդիրները բարելավելու համար»,- ընդգծեց Ժաննա Անդրեասյանը:
Փոխնախարարը նաև հավելեց, որ ԿԳՄՍ նախարարը ապրիլի 30-ին կպարզաբանի, թե ինչպես են կազմակերպվելու ընդունելության քննությունները:
Մանրամասն՝ տեսանյութում:
