Այսօր՝ ապրիլի 28-ին, Ազգային ժողովում հրավիրվել է արտահերթ նիստ: Քննարկվում է 2020թ. պետբյուջեի մասին օրենքում փոփոխություն և լրացումներ կատարելու մասին օրենքի նախագիծը:
Անկախ պատգամավոր Արման Բաբաջանյանը հայտարարեց, որ ներկայացվող նախագիծն ունի քաղաքական և տնտեսական բաղադրիչներ. «Առաջարկվող նախագծով խորհրդարանից վերցվում է կարևորագույն լիազորություններից մեկը` գործադիր իշխանության ծախսերը վերահսկելու լիազորությունը»:
Նրա խոսքով` արդեն ասվեց, որ խորհրդարանական երկրում դա անթույլատրելի է, սակայն գործադիրն էլ իր դրդապատճառներն ունի. «Գործադիրն ուզում է ավելի ճկուն գործելու հնարավորություն ստանալ, ինչը կարևոր է մեր ճգնաժամային պայմաններում: Սակայն դա խորհրդարանին վերահսկողության լիազորությունից զրկելու բավական անհամոզիչ և թույլ հիմնավորում է, քանի որ կառավարությունը վերջին 1-1.5 ամսում հնարավորություն է ունեցել ցանկացած պահի նախաձեռնությամբ հանդես գալ արտահերթ նիստ հրավիրելու, և մենք միշտ պատրաստ ենք եղել արձագանքել»:
Անդրադառնալով նախագծի տնտեսական բաղադրիչին` պատգամավորը հայտնեց իր մտահոգությունները. «Կառավարությունը ցանկանում է պետական պարտքը մեծացնելու հնարավորություն ստանալ առանց հստակ և կոնկրետ ծրագրերի: Սա շատ խոցելի է դարձնելու այդ միջոցների ծախսման արդյունավետության նկատմամբ խորհրդարանական վերահսկողությունը, մինչդեռ ճգնաժամի պայմաններում բազմապատիկ կարևոր է ամեն մի լումայի ծախսման արդյունավետությունը: Գումար ներգրավելը մի բան է, դրանք արդյունավետ ծախսելը` այլ. նախկինում մենք տեսել ենք, թե ինչ գումարներ են բերվել երկիր կրկին ճգնաժամի պատրվակով, և տեսել ենք, թե ինչպես են դրանք մսխվել: Լայն իմաստով` մենք զրկվում ենք այդ ծախսերի արդյունավետությունը վերահսկելու հնարավորությունից, ինչը ևս շատ վատ է»:
Բաբաջանյանի խոսքով` ճգնաժամային իրավիճակները պահանջում են ոչ ստանդարտ մոտեցումներ. «Քաղաքակիրթ աշխարհում խոշոր գործարարներն անում են ամեն ինչ իրենց երկրների կառավարություններին աջակցելու համար: Մեզ մոտ, ցավոք, բիզնեսը չի ցուցաբերում սոցիալական պատասխանատվության անհրաժեշտ մակարդակ, բայց այդ հարցում միայն բիզնեսին մեղադրելը ճիշտ չէ. պետությունն է պարտավոր մշակել մեխանիզմներ»:
«Քննարկվող նախագիծը լայն դաշտ է բացում պոպուլիզմի և պոպուլիստների համար, ինչը մենք տեսանք այս դահլիճում»,- ընդգծեց նա և խոսելով կառավարության 2 տարվա աշխատանքի մասին` նկատեց. «Երկու տարվա վաղեմության հեղափոխությունը նաև նրա մասին էր, որ պիտի պատասխանատվության կանչվեին նախկին իշխանության շատ ու շատ այլ թալանչիներ, որոնցից հավաքագրված միջոցները կարող էին մեզ ավելի ապահովագրել արտաքին միջոցների ավելի համեստ ծավալներ ներգրավելուց»:
Մանրամասները՝ տեսանյութում:
