Թերթը գրում է. «Մարտի կեսերին հանրապետության նախագահի հրավիրած խորհրդակցության ժամանակ կառավարությանը հրահանգել էր երկու ամսվա ընթացքում անել ամեն ինչ, որպեսզի արձանագրվի այնպիսի գնանկում, որ մարդիկ իրենց կյանքում իրապես զգան դրական փոփոխություն:
Սակայն մարտյան խորհրդակցությունից հետո անցել է ոչ թե երկու, այլ ուղիղ չորս ամիս, և ոչ ոք, այդ թվում նաև հանրապետության նախագահը, չեն հիշում տրված հանձնարարականների, նախանշված ցուցանիշների և դրանց կատարմանն անդրադառնալու անհրաժեշտության մասին: Սկսվել է ակտիվ բերքահավաքի շրջանը, սակայն գյուղերի քարուքանդ եղած ճանապարհներին այլևս չեն երևում կառավարական բարձրաստիճան չինովնիկների «պադավատները»: Կառավարությունը, Վիճակագրական ծառայությունը մերթընդմերթ հանրությանը տեղեկացնում են գների որոշակի անկման, նախորդ տարվա համեմատ տնտեսական ակտիվության ցուցանիշի փոքր-ինչ աճի մասին: Եվ չնայած դրան՝ հանրապետության նախագահը չի շտապում խոսել մարտին իր տված հանձնարարականների կատարման արդյունքների մասին»:
«Երկիր»-ը հավելում է. «Սա կարող է երկու բան նշանակել. կամ նախագահին լիովին բավարարում են իրեն ներակայացվող ցուցանիշները, և նրան համոզել են, որ մարդիկ հիմա նույնիսկ ավելի լավ են ապրում, քան 2008-ին, կամ էլ ընդհակառակը՝ ներկայացված ցուցանիշները չափազանց վատն են և ցույց են տալիս, որ հանձնարարականները չեն կատարվել պատշաճ մակարդակով, և նախագահն ուղղակի անհարմար է զգում արձանագրել այդ փաստը և բացահայտել իր նշանակած վարչապետի և կառավարության անգործունակությունը»: