ԱՄՆ նախագահ Դոնալդ Թրամփը քննադատել է New York Times թերթում հրապարակված հոդվածը, որում խոսվում է աշխատավայրում իր սովորությունների մասին։ Սպիտակ տան ղեկավարն իր մեկնաբանությունը հրապարակել է Twitter-ում։
Նա հրապարակումը «ֆեյք» է անվանել, իսկ դրա հեղինակն «երրորդ կարգի լրագրող», որն իր՝ Թրամփի մասին ոչինչ չգիտի։
ԱՄՆ առաջնորդը նշել է, որ ինքն արդեն մի քանի ամիս շարունակ մինչև ուշ գիշեր աշխատում է Սպիտակ տանը, որպեսզի ավարտին հասցնի առևտրային գործարքների վերաբերյալ համաձայնագրերը և վերականգնի զինված ուժերը։
«Ինձ ճանաչող մարդիկ կասեն, որ ես պատմության մեջ ամենաաշխատասեր նախագահն եմ»,- գրել է Թրամփը։
Նա նաև ընդգծել է, որ իր նախագահության ընթացքում հնարավոր է ավելին է արել, քան մյուս նախագահները, ինչն էլ նախանձի առիթ է դառնում «կեղծ ԶԼՄ-ների համար»։
NYT-ում հրապարակված հոդվածում ասվում է այն մասին, որ ԱՄՆ նախագահն իր աշխատանքային ժամանակի մեծ մասն անցկացնում է թերթեր ընթերցելով և ննջարանում հեռուստացույց դիտելով։
