Հայաստանի ազգային պատկերասրահում շարունակում է գործել սյուրռեալիստական ուղղության հայտնի նկարիչներ Սալվադոր Դալիին, Հանս Բելմերին, Լեոնոր Ֆինիին, Ջորջո դե Կիրիկոյին նվիրված՝ 160 տպագիր գրաֆիկայի ցուցահանդեսը։
Ցուցադրությանը ներկայացված են աբստրակցիոնիզմի հիմնադիր Վասիլի Կանդինսկու գրաֆիկական թերթերը` քսիլոգրաֆիաները, «Արժիլե» պատկերասրահի (ԱՄՆ, Լոս Անջելես) տնօրեն Քրիստին Արժիլեի հավաքածուից: Ցուցահանդեսի շրջանակում ներկայացված են նաև այն հայ նկարիչների ստեղծագործությունները, որոնց աշխատանքների վրա առկա է սյուրռեալիզմի ազդեցությունը՝ Եր. Քոչար, Հ. Հակոբյան, Լ. Թութունջյան, Գ. Խաչատրյան, Ս. Փարաջանով և այլք:
Դադաիզմի և սյուրռեալիզմի առաջնորդների ընկեր և հասակակից Պիեռ Արժիլեն ստեղծել է ամենանշանակալից հավաքածուներից մեկը, որն ընդգրկում է Հանս Արպի, Տրիստան Տցարայի, Ջորջո դե Կիրիկոյի, Վասիլի Կանդինսկու և այլ վարպետների ստեղծագործությունները։ Դրանք կներկայացվեն այս ցուցադրության շրջանակում:
Ցուցանմուշների մեջ մեծ թիվ է կազմում Սալվադոր Դալիի պղնձափորագրության ամենամեծ հավաքածուն, որից 120 օֆորտ է ցուցադրվում Հայաստանի ազգային պատկերասրահում։ Դրանց թվում են «Մալդորորի երգերը», «Դիցաբանություն», «Ֆաուստ», «Հիպպի» և այլ շարքեր: Սրահում ներկայացված աշխատանքների մեծ մասն ստեղծվել է 1934-1973 թթ. և իր ուրույն տեղն է գտել 20-րդ դարի փորագրության ոսկե ֆոնդում:
Ցուցադրությունը կգործի մինչև սույն թվականի հոկտեմբերի 15-ը։ Տոմսերի արժեքը 800 դրամ է։ Ցուցադրությունը հնարավոր է անվճար դիտել յուրաքանչյուր ամսվա վերջին շաբաթ օրը։
