ԱՄՆ իշխանությունները կարծում են, որ «Ալ-Քաիդան» սեպտեմբերի 11-ի նախօրեին կփորձի ահաբեկչական ակտ իրականացնել ներդրված գործակալների միջոցով: Այս մասին խոսվում է երեկ հետախուզական ծառայությունների հրապարակած զեկույցում: ABC հեռուստաընկերությունը, հղում կատարելով ԱՄՆ Ազգային անվտանգության գործակալության զեկույցին, զգուշացնում է, որ ահաբեկիչները կարողացել են շատ կարևոր պաշտոններ զբաղեցնել արդյունաբերական մի շարք կառույցներում և պլանավորում են իրականացնել ֆիզիկական և քիբերհարձակումներ խոշոր օբյեկտների վրա, օրինակ՝ քիմիական և նավթամշակման գործարաններում:
«Ըստ մի շարք հավաստի տվյալների, որոնք հիմնված են մի շարք այլ միջադեպերի վրա, մենք լուրջ կասկածներ ունենք մտածելու, որ ինսայդերներն ահաբեկիչների շարքից են, և նրանց գործողությունները լուրջ վտանգ են ներկայացնում ԱՄՆ ենթակառուցվածքների և տեղեկատվական խոշոր համակարգերի համար»,- ասված է զեկույցում: «Մեր կարծիքով, ներքին օգտագործման համար նախատեսված ինֆորմացիան տարբեր գործարաններում, ենթակառուցվածքներում, ցանցերում լուրջ գին ունի մեր հակառակորդների համար և կարող է մեծացնել վտանգն ու ավերածությունների չափը կոմունալ ցանկացած ենթակառուցվածքի վրա հարձակման դեպքում»:
Չնայած Պետդեպարտամենտը նշում է, որ որևէ լուրջ վտանգ գոյություն չունի, սակայն Ուսամա բեն Լադենի սպանության ժամանակ առգրավված նյութերը վկայում են այն մասին, որ «Ալ-Քաիդան» ցանկանում է 2001թ.-ի սեպտեբերի 11-ի 10-րդ տարելիցի մոտակա օրերին կամ հենց այդ օրը ահաբեկչական ակտ իրականացնել:
