Այսօր Կենտրոն և Նորք Մարաշ վարչական շրջանների ընդհանուր իրավասության դատարանում տեղի ունեցավ Թաթուլ Մանասերյանն ընդդեմ «Ժամանակ» օրաթերթի հիմնադիր «Սկիզբ Մեդիա Կենտրոն» ՍՊԸ-ի` հայցվորի պատիվը, արժանապատվությունը, գործարար համբավը «զրպարտության» միջոցով արատավորելու և փոխհատուցման պահանջի վերաբերյալ գործով դատական նիստը: Հիշեցնենք, որ հայցվոր կողմն այդ վնասը գնահատել է 2.5 մլն. դրամ:
Պատասխանողի` օրաթերթի շահերը ներկայացնող Նիկոլայ Բաղդասարյանը հայցվորի ներկայացուցչին մի քանի հարցեր ուղղելուց հետո ներկայացրեց իր առարկությունները. նշեց, որ լրագրողը ԱԺ նախագահի արդեն նախկին խորհրդական Թաթուլ Մանասերյանի վերաբերյալ հրապարակումները նախապատրաստելիս ձեռքի տակ ունեցել է մայր քրեական գործը` բաց աղբյուր, որով անցնող վկաներից մեկը ցուցմունք է տվել այն մասին, որ Թաթուլ Մանասերյանն իրեն մի քանի տասնյակ հազար դոլար 12% տոկոսադրույքով գումար է տվել:
Իրավաբանական տերմինաբանությամբ` դա կոչվում է վաշխառություն, որը քրեական օրենսգրքով նախատեսված, պատժելի արարք է: Ավելին, այդ նույն քրեական գործով Թաթուլ Մանասերյանն էլ է ընդունել շահույթ ստանալու նպատակով այդ վկային գումար տալու հանգամանքը, բայց նշել է, թե իբր ուրիշից (ում անունը, տեղը չի հայտնում) է գումարը վերցրել և տվել իր դեմ ցուցմունք տվողին: Նույնիսկ եթե դա լինի ճշմարտությունը, ապա կնշանակի, որ Թաթուլ Մանասերյանը եթե ինքը վաշխառություն չի արել, ապա օժանդակել է վաշխառություն անողին, ինչը ևս քրեորեն պատժելի արարք է: Ընդ որում, այդ փաստերը հրապարակման մեջ ներկայացվել են կասկածանքի կոնտեքստում` հարցադրման ձևով (՞) նշված վերնագրի ներքո: Ավելին, հայցվոր կողմը դատարան ներկայացրեց ՀՀ ոստիկանության քննչական վարչությունից ստացված մի փաստաթուղթ, որտեղ նշված է, որ քննչական վարչությունում կա վաշխառության փաստով հարուցված քրեական գործ, որով որպես վկա է անցնում նաև Թաթուլ Մանասերյանը: Թե ինչու որպես կասկածյալ կամ մեղադրյալ չի անցնում մոտ մեկ տարի առաջ հարուցված քրգործով, կփորձենք պարզել առաջիկայում:
Դատական հաջորդ նիստը նշանակվեց սեպտեմբերի 2-ին ժամը 11.00-ին: