Լուրեր
Այս նախագծի փոխարեն, լավ կլիներ՝ իշխանությունը փողոց դուրս բերեր ուժային կառույցներին

Կորոնավիրուսով վարակվածների շրջանակը պարզելու համար կառավարությունն առաջարկում է հասանելի դարձնել քաղաքացիների անձնական տվյալները՝ տեղաշարժը, հեռախոսազանգերի, հաղորդագրությունների շրջանակը։ Արտակարգ դրության օրենքում փոփոխությունների այս նախագիծն Ազգային ժողովում այսօր կրքեր բորբոքեց: Ինչո՞վ է պայմանավորված այդ օրենքն ընդունելու հրատապությունը:

Թեմայի շուրջ «Առաջին լրատվական»-ի հետ քննարկմանը մասնակցեցին ԱԺ «Իմ քայլը» խմբակցության պատգամավոր Վահագն Հովակիմյանը, վերլուծաբաններ Ռոբերտ Ղևոնդյանը և Հակոբ Բադալյանը:

«Սա գործիք է, որը թույլ է տալու վարակակիրների շփումներն ավելի արագ բացահայտել: Արտակարգ դրության պայմաններում այս օրենքով պարետատունը հնարավորություն է ունենալու բացահայտելու վարակակիրների շփման շրջանակները: Խոսքն այն տվյալների մասին է, որոնց այսօր տիրապետում են Հայաստանում գործող բջջային կապի երեք օպերատորները, այս նախագիծը գաղտնալսման մասին չէ, այլ բաժանորդի տեղաշարժման»,- նշեց Վահագն Հովակիմյանը՝ հավելելով, որ այսպիսի հաջողված փորձ ունեն հարավային Կորեան, Սինգապուրը և այլն:

Պատգամավորը նաև հավելեց, որ եթե քաղաքական մեծամասնությունն այս նախագծի ընդունմամբ այլ նպատակներ իրականացնելու ցանկություն ունենար, կգնար նախկինների ճանապարհով՝ այսինքն՝ թաքուն կօգտվեր այդ տվյալներից, բայց չէր բարձրաձայնի այդ մասին:

Ռոբերտ Ղևոնդյանն ընդգծեց, որ խստագույնս պետք է վերահսկել քաղաքացիների տնից դուրս գալը: «Եթե իշխանությունը ցանկանում է գտնել վիրոսակրի հետ շփումների շրջանակը, շատ ավելի արդյունավետ կլիներ, եթե ուժային կառույցները փողոց դուրս հաներ և հետևեր մարդկանց տեղաշարժին: Օրինակ՝ Չինաստանում, մարդիկ, փողոց դուրս գալով, շրջափակվում էին ոստիկանների կողմից, և եթե կենսական անհրաժեշտությամբ չէր դուրս եկել, միանգամից տուն էր ուղարկվում, Հնդկաստանում ծեծում էին…»,- նշեց վերլուծաբանը:

Հակոբ Բադալյանն ընդգծեց, որ առկա է վարակի տարածումը դանդաղեցնելու և եթե հնարավոր է ընդհանրապես դադարեցնելու խնդիր, և կարևոր է այս գործիքից օգտվելը. «Սա ոչ թե ծայրահեղ , այլ անհրաժեշտ միջոց է, և որ բոլոր հնարավոր գործիքները պետք է օգտագործել համաճարակի դեմ պայքարելու համար… Թվային տեխնոլոգիաների դարում այսպես թե այնպես մենք վերահսկվում ենք, մենք ապրում ենք մի դարում, երբ հնարավոր է մեզ նկարել անգամ տիեզերքից»:

Մանրամասն՝ տեսանյութում:

  • Դիտումներ՝ *