Հանրային ծառայությունները կարգավորող հանձնաժողովն (ՀԾԿՀ) այսօր նիստում ընդունեց որոշում, որով «Հայաստանի էլեկտրական ցանցեր» ընկերությանը պարտավորեցնում է չհոսանքազրկել Գայ գյուղի բնակիչներին էլեկտրաէներգիայի դիմաց ունեցած պարտքի համար՝ մինչև խնդրի վերջնական կարգավորումը: Եթե բաժանորդն ընդունում է պարտքի գոյությունը, «ՀԷՑ»-ի հետ կնքվում է առնվազն 3 տարի ժամկետով պայմանագիր՝ այն մարելու համար: Հակառակ պարագայում խնդիրը պետք է լուծվի դատարանում:
«Տարիներ շարունակ կուտակված պարտքի պատճառով մարդկանց պետք էր նախօրոք զգուշացնել և անջատել: Ընդամենը 1000 դրամ պարտքի համար բոլորի հոսանքը անջատում եք: Ինձ համար անհասկանալի մնաց, թե ինչո՞ւ այդ հսկայական պարտքերի առկայության դեպքում դուք շարունակում եք մատակարարել և հանկարծ տարիներ հետո հիշել եք, որ պարտքեր կան կուտակված»,- հարցադրում արեց ՀԾԿՀ նախագահ Ռոբերտ Նազարյանը:
Նիստին ներկա ԱԺ «Ժառանգություն» խմբակցության պատգամավոր Անահիտ Բախշյանը հայտարարեց, որ պարտքի մասին բնակիչներին պատշաճ կարգով չեն տեղեկացրել, 4 դատական գործերի մասով կան վճիռներ, սակայն քաղաքացիներն անտեղյակ են եղել անգամ պարտք ունենալու մասին: Ա.Բախշյանը տեղեկացրեց, որ դատարանը վճիռներն ուղարկել է ԴԱՀԿ ծառայություն, որը կալանք է դրել գյուղացիների վերցրած վարկերի դիմաց տրված գրավների վրա, և այժմ դրանք չեն վերադարձնում:
«ՀԷՑ»-ի ֆինանսների և էկոնոմիկայի տնօրեն Կոնստանտին Ֆեֆիլովը նշեց, որ ընկերությունը կշարունակի խնդիրները դատական կարգով կարգավորել:
«ՀԷՑ»-ի իրավաբան Վարդան Գրիգորյանը նկատեց, որ եթե վճիռները կայացվել են, և կողմը ծանուցված չի եղել գործի քննության մասին, ապա դա հիմք է բողոքարկելու այդ վճիռը. «Գոյություն ունեն ավելի բարձր դատական ատյաններ: Իսկ մենք կարող ենք ևս մեկ անգամ վերանայել և համադրել հանձնաժողովի աշխատանքի արդյունքների հետ»:
«ՀԷՑ»-ի իրացման տնօրենի տեղակալ Արմեն Մովսիսյանն էլ հայտնեց, որ ներկայացված անդորրագրերի հիման վրա Գայ գյուղի 37 և Հայկաշեն գյուղի 2 բնակիչների մասով կատարվել է վերահաշվարկ 64,659 կվ/ժ էլեկտրաէներգիայի մասով, որը համարժեք 1 մլն 613770 դրամի:
«Առաջին լրատվականի» հետ զրույցում Գայ համայնքի ծախսած էլեկտրաէներգիայի հարցերով ՀՀ էներգետիկայի և բնական պաշարների նախարարի ստեղծած հանձնաժողովի նախագահ Զավեն Գրիգորյանը տեղեկացրեց, որ հանձնաժողովն ավարտել է իր աշխատանքը, 1 ամսում աշխատել է 3 գյուղերում (Գայ, Հայկաշեն, Առատաշեն) և 1800-ից ավելի փաստաթղթային փաթեթներ է ուսումնասիրել, բոլոր առկա կտրոնները, նաև այն հատվածը, որ անդորրագրերը չեն պահպանվել: Կազմվել է 30-35 էջանոց փաստաթղթային փաթեթ, որը ներկայացվել է «ՀԷՑ»-ին, որպեսզի ապահովվի դրա հետագա իրավական կարգավիճակը:
Զ.Գրիգորյանը հայտնեց, որ բնակիչները չեն համաձայնվում 10-15 մլն դրամի չափով պարտքի հետ, և հարցը կքննարկվի. «Դատարանի որոշումը միակ ընդունելի տարբերակն է»:
