Ազգային անվտանգության ծառայությունը հետախուզում է հայտարարել Երևանի նախկին քաղաքապետ, Տրանսպորտի և կապի նախկին նախարար Գագիկ Բեգլարյանի նկատմամբ։ ԱԱԾ-ում քննվող քրգոծի շրջանակում Գագիկ Բեգլարյանը հետախուզվում է ՀՀ քր. օրի 179 հոդվածի 3-րդ մասի 1-ին կետի (յուրացնելը կամ վատնելն՝ առանձնապես խոշոր չափերով) և 308 հոդվածի 2-րդ մասի (պաշտոնական լիազորությունները չարաշահելը, որն անզգուշությամբ առաջացրել է ծանր հետևանքներ) հատկանիշներով։ Նախաքննական մարմինը դիմել է Երևան քաղաքի ընդհանուր իրավասության դատարան, և դատարանը բավարարել է միջնորդությունն ու խափանման միջոց է ընտրվել կալանքը։
Հիշեցնենք, որ փետրվարի սկզբին կայքերից մեկը տեղեկություն հրապարակեց, որ ՀՀ ԱԱԾ քննչական վարչությունում հարուցվել է քրեական գործ Երևանի նախկին քաղաքապետ Գագիկ Բեգլարյանի դեմ։ Նույն տեղեկատվության համաձայն՝ «Վաղարշ և որդիներ» ընկերության հիմնադիր Վաղարշ Աբրահամյանը շինարարություն իրականացնելու համար խոշոր կաշառք է տվել նախկին քաղաքապետին։
Ըստ աղբյուրի, Աբրահամյանը ԱԱԾ քննչական վարչությանը հայտնել է, որ իր ընկերությունը Երևան քաղաքի Անտառային փողոցի թիվ 144/3 հասցեում ժամանակին իրականացրել է բազմաբնակարան շենքի կառուցում, այդ ժամանակ Երևանի քաղաքապետ Գագիկ Բեգլարյանի (Երևանի քաղաքապետ է եղել 2009-2010թթ․) կողմից անհիմն կասեցվելու որոշում է կայացվել։ Բայց, քանի որ ինքը նպատակ է ունեցել շարունակել շենքի շինարարական աշխատանքները, շինղեկի՝ Արամ Վարդանյանի միջնորդությամբ կապ է հաստատել Գ. Բեգլարյանի եղբոր՝ Յուրա Բեգլարյանի հետ ու վերջինիս միջոցով Գ. Բեգլարյանին են մաս-մաս փոխանցել 75 հազար ԱՄՆ դոլար, որից հետո շինարարության վերսկսման հետ կապված խոչընդոտները վերացել են:
Վաղարշ Աբրահամյանը, սակայն, այսօր «Առաջին լրատվական»-ի հետ զրույցում ասաց, որ այս մեղադրանքները, որոնք առաջադրվել են Գագիկ Բեգլարյանին, կապված չեն իր գործի հետ, այլ նրա նախարար եղած ժամանակ հյուսիս-հարավ ավտոմայրուղու շինարարության հետ։
-Ես կարդացի առաջադրված մեղադրանքները, և եթե դուք էլ նայեք, ապա կտեսնեք, որ դա հյուսիս-հարավ ճանապարհի թալանն է։ Նրա նախարար աշխատած ժամանակահատվածի մասին է խոսքը։ Դա մեր հետ կապ չունի։ Բայց հետո չգիտեմ ինչպես կստացվի, մեր գործի հետ ինչ կլինի։
– Պարոն Աբրահամյան, Գագիկ Բեգլարյանի հետ կապված Դո՞ւք եք հաղորդում տվել ազգային անվտանգության ծառայությանը, Դուք եք ասե՞լ, որ 75 հազար ԱՄՆ դոլար կաշառք եք տվել վերջինիս։
-Ես չեմ տվել հաղորդումը, կարող եք քննիչից իմանալ այդ մանրամասները, հեռախոսով էլ չեմ ցանկանում նման թեմաներ քննարկել։ Կարող եք դիմել ու քննիչից իմանալ ով է դիմել, ինչ է ասել, ոնց է ստացվել ու ինչից է ստացվել։
–Իսկ ինչո՞ւ հիմա վերաբացվեց այս պատմությունը։ Այդ հասցեում կառուցված բնակելի շենքերը արդեն շահագործվում են վաղուց։ Ինչու հիմա որոշեցիք բացահայտել, որ շինթույլտվությունը ստացել եք կաշառքի արդյունքում։
-Դե ոնց բացվել է գործը, սկիզբը ոնց եղել է, այդտեղից պետք է հարցնել, իմանալ։ Ինձ հարցրել են, ես էլ ոնց եղել է, այնպես էլ պատմել եմ։
–Այսինքն պատմել եք, որ 75 հազար դոլար կաշառք եք տվել Գագիկ Բեգլարյանին նրա եղբոր միջոցով շինթույլտվության համար։
-Դե տենց մի բան էլի։ Անպայման ուզում եք մի բան ասեմ, թողեք հանգիստ սթրվենք այս վիճակում։ Թող իրավապահները որոշեն ամեն ինչ, գնահատեն վիճակը, կատարվածը։ Ես դրան մասնակից եմ ինչ -որ չափով, ինչ հարցրել են, պատասխանել եմ։ Մնացածից տեղեկութոյւն չունեմ։ Այդտեղ շինարարությունը 10 տարի առաջ ավարտվել է, շենքերը իրենց տերերը ունեն և մարդիկ ապրում են դրանց մեջ։
–Այսինքն Դուք հարցաքննվե՞լ եք արդեն այս գործով։
-Ես Հայաստանում չէի, վերադարձել եմ ու ինձ դեռ չեն կանչել ԱԱԾ։ Կհրավիրեն հարցաքննության, Դուք էլ կիմանաք այդ մասին։
–Իսկ կաշառք առաջարկելը ձեր կամքով է եղել, թե այն ժամանակվա քաղաքապետն ինքն է կաշառք պահանջել շինթույլտվության համար։
-Այդ հարցերին թույլ տվեք չպատասխանել Քննիչներից կարող եք ամեն ինչ իմանալ։ Դուք պետք է գտնեք, թե այդ ինֆորմացիան որտեղից է եկել, որտեղից է սկսվել քրեական գործը, այնտեղից էլ կարող եք մանրամասներ իմանա։
–Պարոն Աբրահամյան, իսկ ոսկու շուկան աշխատում է այս օրերին։
-Չի կարող շուկան աշխատի։ Կասեցված է աշխատանքը։
–Այսօրվանի՞ց եք կասեցրել, թե՞ ավելի վաղ։
-Մենք 10-20 օր առաջ ենք կասեցրել, մինչև պարետի հայտարարելը։ Մենք նպատակահարմար ենք գտել աջակցել պատկան մարմիններին վարակի տարածումը կանխելու համար։
