Արցախի Հանրապետության նախագահ Բակո Սահակյանը մարտի 23-ին շնորհավորական ուղերձ է հղել Աբխազիայի Հանրապետության նորընտիր նախագահ Ասլան Բժանիային: Ուղերձում ասված է. «Մեծարգո՛ Ասլան Գեորգիի, Արցախի Հանրապետության ժողովրդի, իշխանությունների և անձամբ իմ անունից ի սրտե շնորհավորում եմ Ձեզ Աբխազիայի Հանրապետության նախագահական ընտրություններում տարած հաղթանակի կապակցությամբ: Ձեր անցած ճանապարհը, գիտելիքները, պետական ու քաղաքական գործչի փորձը, անկասկած, կծառայեն Աբխազիայի հետագա բազմակողմանի զարգացմանն ու նրա պետական ինքնիշխանության ամրապնդմանը: Արցախում բարձր են գնահատում Աբխազիայի հետ բարեկամության և սերտ համագործակցության ավանդույթների վրա հիմնված եղբայրական հարաբերությունները: Համոզված եմ, որ մեր երկրների եւ ժողովուրդների միջեւ կապերը հետագայում ևս կընդլայնվեն ու կխորանան: Կրկին շնորհավորում եմ Ձեզ, հարգարժա՛ն Ասլան Գեորգիի, պետության ղեկավարի բարձր և պատասխանատու պաշտոնում ընտրվելու կապակցությամբ: Մաղթում եմ բարեկեցություն և հաջողություններ Ձեր բոլոր նախաձեռնություններում՝ հանուն Աբխազիայի խաղաղության եւ բարգավաճման»-նշել է ԱՀ հեռացող նախագահն իր ուղերձում։
Քաղաքագետ Ռուբեն Մեհրաբյանի կարծիքով՝ սա ևս մեկ անգամ ցույց է տալիս, որ Արցախի գնացող ղեկավարությունը բացարձակապես անհաղորդ է այն ամենին, ինչ արվում ու ասվում է Երևանում. «Եվ շարունակում է իր «զորիբալայանական աշխարհընկալմանը հարիր ու համահունչ իր մոտեցումները։ Բայց ես կարծում եմ, որ նոր ընտրություններով այս ամեն ինչը կվերջանա։ Բացի այդ, հարկ է նշել, որ հայ-վրացական հարաբերություններում հաստատվել է այնպիսի երկխոսություն, որ սա որևէ ձևով չի կարող բացասական առումով ինչ-որ բան փոխել»,-«Առաջին լրատվական»-ի հետ զրույցում ասաց նա։
Ըստ Մեհրաբյանի՝ սա տարիներից եկող իներցիա է.«Վերջին «կարապի երգերներն» են։ Հիմնված է այն իլուզիայի վրա, որ սա կարող է հաճելի լինել Ռուսաստանին կամ կարող է Ռուսաստանի վերաբերմունքի մեջ որևէ բան փոխել։ Բայց մենք պետք է շատ լավ հասկանանք, որ Ռուսաստանը թքած ունի բոլորի և հավասարապես ամեն ինչ վրա»,-եզրափակեց նա։
Քաղաքական մեկնաբան Հակոբ Բադալյանի կարծիքով՝ այս իրավիճակը, «ավանդույթը» նոր չէ. «Վրաստանը ֆորմալ առումով սա չի ընդունում և շատ հասկանալի է։ Բայց ես կարծում եմ, որ այս հարցը Վրաստանն ու Հայաստանը տարիների ընթացքում քննարկել են ու լռելյայն եկել են փոխըմբռնման և չեմ կարծում, որ այս իրավիճակը իրական քաղաքական ռեժիմում հայ-վրացական հարաբերությունների համար խնդիր է»,-«Առաջին լրատվական»-ի հետ զրույցում ասաց նա։
Ըստ Բադալյանի՝ սա կարող է դուր չգալ Վրաստանին, բայց նաև Վրաստանի պաշտոնյաների բազմաթիվ քայլեր ու հայտարարություններ են լինում, որոնք չեն բխում Հայաստանի շահերից.«Մենք էլ հասկանում ենք, որ վրացիներն իրենց խնդիրներն ունեն Թուրքիայի ու Ադրբեջանի հետ և բնական է, որ Հայաստանի հետ հարաբերության համար իրենք չեն խզելու իրենց հարաբերությունները Թուրքիայի ու Ադրբեջանի հետ։ Կա հայ-վրացական փոխըմբռնում և փոխադարձ շահերը շատ ավելի կարևոր են»։
Մեր զրուցակցի դիտարկմամբ՝ Արցախն Աբխազիայի հետ նույնականացնելու խնդիր չկա, հատկապես որ քաղաքական ամբողջական շրջանակի իմաստով մենք տեսնում ենք, որ հիմնականում արարողակարգային դրսևորման շրջանակներում է այս կապը․ «Այսինքն շնորհավորանքներ, երբեմն՝ այցեր, այդքանը։ Հասկանալի է՝ Արցախը չճանաչված պետություն է և պետք է հասկանանք, որ չճանաչված պետության տրամաբանության մեջ կարող են լինել շփումներ այլ չճանաչված պետությունների հետ։ Դիտարկել իրավիճակը ճանաչված միջազգային իրավունքի սուբյետի տեսանկյունից՝ այնքան էլ համարժեք չէ»։
