Ադրբեջանական APA լրատվական գործակալության հաղորդմամբ՝ թուրքական Hürriyet Daily News and Economic Review թերթին տված հարցազրույցի ժամանակ Ադրբեջանի Հանրապետության պետական նավթային ընկերության (SOCAR) փոխնախագահ Էլշադ Նասիրովն անդրադարձ է կատարել թուրքական տարածքով ադրբեջանական էներգակիրների տարանցման խնդրին.
«Ռուսաստանը ցանկանում է ամբողջովին գնել մեր բնական գազը։ Սակայն մենք չենք ցանկանում կախում ունենալ մեկ գնորդից։ Դրա համար էլ մենք մեր գազը վաճառում ենք ինչպես ԵՄ-ին, այնպես էլ՝ Իրանին ու Ռուսաստանին։
Ճապոնիայում տեղի ունեցած բնական աղետից հետո բնական գազի համաշխարհային պահանջարկը միայն աճելու է, ինչը դրականորեն է ազդելու Ադրբեջանի վրա։ «Շահ Դենիզ 2» նախագծի իրականացումը պահանջում է 20-30 միլիարդ դոլար։
Ինչ վերաբերում է ոչ վաղ անցյալում Թուրքիայում Nabucco գազատարի նախագծի շուրջ կնքված միջպետական համաձայնագրին, ապա ցայժմ ադրբեջանական կողմը դեռևս ոչ մի երկրի կողմից չի ստացել դրա պատճենը, այդ փաստաթուղթը ստորագրած երկրներից և ոչ մեկն էլ Ադրբեջանի հետ չի կիսվել դրա բովանդակության մասին։ Ադրբեջանը ձգտում է օբյեկտիվորեն և պրագմատիկորեն դիտարկել գոյություն ունեցող երեք նախագծերն էլ Nabucco, TAP (Անդրատլանտյան խողովակաշար) և İTGİ (Թուրքիա-Իտալիա-Հունաստան)։
Ապրիլ-մայիսին մենք շատ մոտ էինք Թուրքիայի հետ տարանցիկ համաձայնագիր կնքելուն։ Սակայն դա ամբողջովին իր ավարտին հասցնելուն խանգարեցին ոչ միայն փոքր պահերը, այլև՝ կարևոր գործոնները: TAP և İTGİ նախագծերի իրագործումը կախված է թուրք-ադրբեջանական տարանցիկ համաձայնագրից։ Շատ քիչ ժամանակ է մնացել Nabucco-ի համար ներդնողների փնտրման հարցում։ Սակայն մենք դեռևս պատասխան չենք ստացել Եվրոպայից»։
Հիշեցնենք, որ հունիսի 8-ին Թուրքիայի Կայսերի (Թուրքիայի նախագահ Աբդուլլահ Գյուլի հայրենի) քաղաքում տեղի է ունեցել Nabucco Gas Pipeline International GmbH կոնսորցիումի և Nabucco գազատարի նախագծին աջակցող տարանցիկ երկրների (Ավստրիա, Բուլղարիա, Հունգարիա, Ռումինիա և Թուրքիա) միջև համաձայնագրի ստորագրումը։
