ԱՄՆ նախագահ Դոնալդ Թրամփի անձնական բժիշկ Շոն Քոնլին հայտարարել է, որ նախագահի մոտ կորոնավիրուսի առկայության թեստ անցկացնելու անհրաժեշտություն չկա, հաղորդում է ՌԻԱ «Նովոստին»՝ հղում անելով Սպիտակ տան հաղորդագրությանը։
Քոնլիի խոսքերով՝ անալիզ անելու կարիք չկա, քանի որ նախագահի մոտ հիվանդության որևէ ախտանշան չի նկատվում։
Միևնույն ժամանակ նա հաստատել է, որ բրազիլական պատվիրակության հետ հանդիպման ժամանակ Թրամփը շփում է ունեցել այն մարդու հետ, ում մոտ երեք օր անց կորոնավիրուս է հայտնաբերվել։ Բացի այդ, այդ երեկոյան Թրամփի հետ միևնույն սեղանի շուրջ նստած ևս մեկ հյուրի մոտ կորոնավիրուս է հայտնաբերվել։
Այնուամենայնիվ, ուրբաթ մամուլի ասուլիսի ժամանակ Դոնալդ Թրամփը հայտարարել է, որ «հավանաբար» ինչ-որ պահի իր մոտ նույնպես COVID-19-ի առկայությունը կստուգեն։
