Ամերիկյան կառավարության կողմից հրապարակված պաշտոնական վիճակագրության համաձայն՝ ամերիկյան վիզաների մերժման միջին տոկոսն աշխարհում կազմում է 23%: 2010 թ. ֆինանսական տարում ԱՄՆ իշխանությունները ստացել են վիզա ստանալու ավելի քան 9 միլիոն հայտ: Ընդհանուր առմամբ, մերժվել է մոտ 2.1 միլիոն հայտ: Այս մասին հաղորդում է ITAR-TASS գործակալությունը:
ԱՄՆ պետքարտուղարի տեղակալ Ջենիս Ջեյքոբսի խոսքերով, որը համակարգում է հյուպատոսական աշխատանքները, այն բազան, որն օգտագործվում է հյուպատոսական ծառայությունների կողմից արտերկրում, կազմում է 39 միլիոն անուն: Նրանցից 27 միլիոնի նկատմամբ կան այս կամ այն աստիճանի բացասական տեղեկություններ: Ջեյքոբսն ասել է, որ 2001 թվից ի վեր տվյալների այդ բազան ավելացել է 400%-ով:
