ԱՄՆ նախագահ Բարաք Օբաման հայտարարել է, որ որոշակի առաջընթաց է գրանցվել պետական պարտքի վերին հնարավոր շեմի բարձրացման ուղղությամբ: Միաժամանակ հանրապետական կուսակցության ներկայացուցիչները հավելել են, որ բավարարված են Սպիտակ տան հետ ունեցած բանակցությունների ընթացքից: Այս մասին հաղորդում է BBC-ն:
Օբաման ողջունել է կոնգրեսականների կողմից ներկայացված նախագիծը, որով սահմանվում է պետական ծախսերի 3.75 տրիլիոն դոլարի չափով կրճատում, ինչպես նաև մոտ մեկ տրիլիոն եկամուտների ապահովում հարկերի բարձրացման շնորհիվ: Օբաման նաև կոչ է արել մի կողմ դնել «ձևական ժեստերը» և սկսել օրենքներ գրել:
Մի քանի շաբաթ ծանր սպասումների մեջ գտնվող շուկան անմիջապես արձագանքել է այս հայտարարություններին. ոսկու գինը սկսել է նվազել, ինչը նշանակում է, որ ներդրողները հեռանկարներ են տեսնում ամերիկյան տնտեսության մեջ ներդրումներ կատարելու համար:
