Ստամբուլի «Ժամանակ» օրաթերթի գլխավոր խմբագիր Արա Գոչունյանը, «Առաջին լրատվականի» հետ զրույցում գնահատելով Հայաստանում ձևավորված քաղաքական նոր մշակույթը, նշեց.
«Վերջին շրջանում ձևավորված քաղաքական կյանքում իշխանության և ընդդիմության միջև մի բեկումնային պահ եղավ երեկ, երբ իշխանության և ՀԱԿ-ի ներկայացուցիչները իրար դիմաց նստեցին և քննարկեցին ինչ-ինչ քաղաքական խնդիրներ, որոնք այսօր ծառացած են Հայաստանի առջև։ Բնականաբար, հայկական ավանդույթների տեսակետից սա կարևոր իրադարձություն է, և պետք է ասել, որ անկախ պետականության տեր ժողովրդի քաղաքական հայացքներին, հասուն քաղաքական մտքին հարիր երևույթ է, երբ որ համազգային նշանակության խնդիրների կապակցությամբ իշխանությունը և ընդդիմությունը զգում են պատասխանատվություն և տարբեր մոտեցումերով, տարբեր աշխարհայացքով, անգամ մրցակցության երևույթներով հանդերձ՝ կարողանում են համախմբվել մի սեղանի շուրջ, կարծիքներ փոխանակել այն խնդիրների կապակցությամբ, որոնք հայոց պետականության ամրապնդման տեսակետից լուրջ նշանակություն ունեն»։
Արա Գոչունյանը նաև հավելեց. «Ինձ թվում է՝ սա միաժամանակ հայկական սփյուռքի կարոտած, ակնկալած երևույթն է հայրենի քաղաքական գործիչներից, որովհետև, ինչպես գիտենք, սփյուռքը, լինելով հայրենիքից դուրս, հայրենիքի վերաբերյալ ներքին քաղաքական պրոցեսները միշտ էլ իդեալականության ձգտումներով է ընկալում։ Մարդիկ չեն ցանկանում, որ երկփեղկվածություններ առաջանան հայրենի քաղաքական թատերաբեմի վրա»։
Արա Գոչունյանը երկխոսությունը որակեց որպես բարձր պատասխանատվության դրսևորում և իր հերթին ողջունեց կողմերի ցուցաբերած բարի կամքը. «Այս երկխոսությունը հրատապ խնդիրների նկատմամբ բարձր պատասխանատվության դրսևորում է, ինչը վկայում է մեր պետականության ամրության երաշխիքների մասին։ Հետևաբար, ողջունելի իրադարձություն է, և ես մաղթում եմ, որ գործընթացը ունենա իր դրական շարունակությունը»։