Գլենդելի քաղաքային խորհրդի մարտի երեքի ընտրություններին ութ թեկնածու է առաջադրվել, որոնցից հինգը հայ են՝ Գրեգ Աստորյան, Արտաշես Արդի Քասախյան, Վիլյամ Քեշիշյան, Լեոնարդ Մանուկյան, Վարդան Ղարպետյան։ Գլենդել քաղաքի քարտուղարի պաշտոնը զբաղեցրած Արտաշես Արդի Քասախյանը, ըստ շրջանառվող լուրերի, ամենամեծ շանսերն ունի այս ընտրություններին, թեև գլենդելահայերը նշում են, որ այս անգամ իրականում շատ մեծ ընտրություն չունեն, ավելին՝ համայնքից շատերը ձայն չեն տա հայ թեկնածուներից և ոչ մեկին։ Արտաշես Արդի Քասախյանին աջակցող հայտարարությամբ է հանդես եկել ԱՄՆ–ում գործող արցախյան պատերազմի և ԱՄՆ բանակի վետերանների ՀԱՅԴՈՒԿ կազմակերպությունը և ԱՄՆ գեոպոլիտիկ ակումբը։
Լոս Անջելեսի արհմիությունների ներկայացուցիչ Ստեփան Հովակիմյանը «Առաջին լրատվական»-ի հետ զրույցում, անդրադառնալով Գլենդելի քաղաքային խորհրդի ընտրություններին, նշեց, որ պետք է կարևորել ոչ թե այն, որ հայ է և կուրորեն գնալ ձայն տալ հային, այլ թե արդյոք նա համապատասխանում է այդ աշխատանքին։ Այնուամենայնիվ, Հովակիմյանն առանձնացրեց Արդի Քասախյանին, որը, նրա խոսքով, որպես Գլենդել քաղաքի քարտուղար՝ հանրօգուտ աշխատանք է իրականացրել։
«Պետք է թեկնածուն արժանիքներ, գիտելիք ունենա։ Շուտով կլրանա 35 տարին, որ Գլենդելում եմ ապրում և աշխատում, բայց երբ ինձ հարցնում են՝ ինչո՞ւ չես մտածում ընտրություններին առաջադրվելու և մասնակցելու մասին, ես շատ հստակ պատասխանում եմ՝ այդ տեղն իմ տեղը չէ։ Այսինքն՝ ես ինձ ոչ թե արժանի չեմ գտնում, այլ որ ուրիշ տեղ ես շատ ավելի օգտակար կարող եմ լինել իմ համայնքին։ Ամեն մեկը պետք է շատ հստակ իրեն հարց տա՝ ինչ ունի տալու քաղաքին, արդյոք աթոռին պարզապես նստե՞լն է։ Ես չեմ կարծում դա այդքան կարևոր է, եթե դու տալու բան չունես։ Ոչ ոք թող չնեղանա ինձնից, բայց ես, թեև խուսափում եմ անուն տալ և որևէ մեկի վրա ազդեցություն ունենալ իմ արտահայտած դիրքորոշմամբ, բայց կոչ եմ անում՝ տեսեք թեկնածուներից ով ինչ արժանիք ունի և նոր ընտրություն կատարեք»,-նշեց Հովակիմյանը։ Նրա խոսքով՝ պետք է ընտրել այն թեկնածուին, որը արժանի է առաջիկա չորս տարիներին ծառայել Գլենդելի քաղաքային խորհրդում։
Հովակիմյանը նշեց, որ Գլենդելի քաղաքապետարանի խորհրդում հայեր ունենալն անհրաժեշտություն է, որպեսզի հայօգուտ որոշումներ կայացվեն։