«Լիբերալ երիտասարդության միջազգային ֆեդերացիան», որի անդամ է նաև Հայոց համազգային շարժման երիտասարդական ասոցիացիան, և կազմված է տարբեր երկրների հարյուր հինգ կուսակցությունների երիտասարդ թևերից, նախորդ շաբաթ Սիրիայում հրավիրել էր համաժողով: Համաժողովի ընթացքում ՀՀՇ երիտասարդական թևի ներկայացուցիչները ներկաներին առաջարկել են բանաձևի մի նախագիծ, որն ընդունվել է միաձայն: Ներկայացնում ենք այդ բանաձևի տեքստն ամբողջությամբ:
«Հաշվի առնելով երիտասարդ առաջնորդ և 2009 թվականից քաղբանտարկյալ հանդիսացող Նիկոլ Փաշինյանի նկատմամբ վերջերս իրականացված ֆիզիկական բռնությունը, ինչպես նաև ս.թ. նոյեմբերի 9-ին կայացած խաղաղ ցույցի ժամանակ Հայաստանի ոստիկանության կողմից երիտասարդ քաղաքական ակտիվիստների նկատմամբ գործած ապօրինությունները;
Ընդգծելով այն փաստը, որ մի երկրում, որը ձգտում է ժողովրդավարական արժեքներին և եվրոպական կառույցներին էլ ավելի ինտեգրվելուն անընդունելի են քաղբանտարկյալների գոյությունն ու քաղաքական հետապնդումները;
Հավատարիմ մնալով ժողովրդավարության, քաղաքացիական հասարակության և մարդու իրավունքների ու հիմանարար ազատությունների իրական գաղափարներին,
Լիբերալ երիտասարդության միջազգային ֆեդերացիան (ԼԵՄՖ) դատապարտում է երիտասարդ ակտիվիստների հանդեպ իրականացվող քաղաքական հետապնդումները, ինչպես նաև՝ քաղբանտարկյալ Նիկոլ Փաշինյանի հանդեպ կալանավայրում գործադրված բռնության դեպքերը:
ԼԵՄՖ-ն կոչ է անում Հայաստանի իշխանություններին՝ իրականացնել վերը նշված իրադարձությունների անաչառ, համապարփակ հետաքննություն և պատժել մեղավորներին օրենքի ողջ խստությամբ:
ԼԵՄՖ-ն Հայաստանի իշխանություններին նաև կոչ է անում անհապաղ լուծել 12 քաղբանտարկյալների խնդիրը, ինչը ևրոպական ընտանիքին միանալու Հայաստանի պատրաստության ազդանշան կհանդիսանա։
ԼԵՄՖ-ը կոչ է անում Ֆեդերացիայի բյուրոյին և անդամ կազմակերպություններին հետևել այս պահանջների կատարման ընթացքին և պահպանել ակտիվ ներգրավվածությունը Հայաստանում քաղաքական հալածանքներին առնչվող խնդիրներում»։