Իրանի Ղոմ քաղաքում, որտեղից սկսվել է կորոնավիրուսի տարածումը, վիրուսից 50 մահացածների վերաբերյալ տեղեկությունները չեն համապատասխանում իրականությանը: Այդ մասին հայտարարել է Իրանի առողջապահության փոխնախարար Իրաջ Հարիրչին՝ տեղեկացնում է RIA Novosti-ն։
Հարիրչին ավելի վաղ հայտնել էր, որ Իրանում կորոնավիրուսով վարակման դեպքերի թիվը կարող է կազմել մոտավորապես 60: «Ասել են 50 մահացածների մասին, դուք մեզ պաշտոնապես նամակում նշեք անունները:
Հայտարարվել է 50-ի մասին, բայց ես ձեզ ուղղակիորեն կասեմ, որ եթե Ղոմում այդ հիվանդության պատճառով մահացածների թիվը կազմում է դրա կեսը կամ քառորդ մասը, ապա ես հրաժարական կտամ»,- ասել է նա մամուլի ասուլիսի ընթացքում, որը ցուցադրվել է իրանական հեռուստատեսությամբ:
Ավելի վաղ Ղոմից պատգամավոր Ահմադ Ամիրաբադին հայտարարել էր, որ առողջապահության նախարարի ասածները չեն համապատասխանում իրականությանը: Նրա խոսքով՝ կորոնավիրուսը Ղոմում հայտնաբերվել է երեք շաբաթ առաջ», մինչդեռ իշխանությունները հասարակությանը առաջին երկու դեպքերի մասին տեղեկացրել են միայն փետրվարի 19-ին:
Խորհրդարանականը նշել է, որ իրադրությունը քաղաքում «ավելի կրիտիկական է, քան ասում են»: Միևնույն ժամանակ պատգամավորը նշել է քաղաքում վիրուսի 50 զոհերի մասին: Մինչդեռ երկրի առողջապահության նախարարության ներկայացուցիչ Քիանուշ Ջահանփուրը լրագրողներին հայտնել է, որ Իրանում կորոնավիրուսով վարակման գրանցված դեպքերի թիվը հասել է 64-ի, մահացել է 12 հոգի: «Այս պահի դրությամբ միանգամայն ստույգ է, որ երկրում կա COVID-19-ով վարակման 64 դեպք: Ցավոք, անցած օրերին նրանցից 12-ը մահացել են»,- ասված է Ջահանպուրի հայտարարության մեջ, որը հրապարակված է գերատեսչության կայքում։
