Լուրեր
Ինձ աջակցում են ընդդիմադիր և թավշյա հեղափոխությունից հետո ձևավորված նոր ուժերը. Մասիս Մայիլյան
  • 12:40
  • 2020-02-24
  • Դիտումներ՝ *

«Առաջին լրատվական»-ը շարունակում է իր աշխատանքը Արցախի մայրաքաղաք Ստեփանակերտից: Այժմ մեր զրուցակիցն է Արցախի նախագահի թեկնածու Մասիս Մայիլյանը:

Ինչպես նշեց մեր զրուցակիցը, այժմ ավելի շատ ազատականություն կա, ինչը պայմանավորված է Հայաստանում տեղի ունեցած փոփոխություններով. «Եվ այժմ ավելի շատ ուժեր են փորձում մասնակցել թե՛ նախագահական, թե՛ խորհրդարանական ընտրություններին: Իսկ մեր հիմնական թեզն այն է, որ մենք գալիս ենք արմատական բարեփոխումներ և համակարգային փոփոխություններ կատարելու համար: Բայց չեմ կարծում, որ հիմա ընդհանրապես պետք է փոխենք կառավարման համակարգը նախագահականից դեպի խորհրդարանական, բայց գործող Սահմանադրության մեջ որոշակի փոփոխություններ պետք է կատարվեն»:

Նրա խոսքով՝ գործող կառավարման համակարգը հնացած է և չի համապատասխանում նոր մարտահրավերներին. «Ես, որպես նախագահի թեկնածու, և «Նոր Արցախ» դաշինքը գալիս ենք այդ նորը բերելու: Մենք ոչ թե նոր ընտրությունների շեմին ենք, կամ այս ընտրություններով ոչ թե միայն իշխանություն պետք է փոխվի, այլ հիմա դարաշրջան է փոխվում: Հաշվի առնելով նաև Հայաստանում տեղի ունեցած թավշյա հեղափոխությունը՝ մենք պետք է համապատասխանեցնենք մեր համակարգը, ի վերջո՝  մենք մի երկիր ենք՝ դեռևս երկու հայկական պետություններով, և մենք պետք է սինխրոնիզացված ու համահունչ քայլերով առաջ գնանք»:

Անդրադառնալով տարածվող խոսակցություններին, թե ինքը գործող իշխանության թեկնածուն է, Մասիս Մայիլյանն ասաց. «Կարծում եմ՝  ովքեր ծանոթ են ներքին խոհանոցին, գիտեն, թե ով է գործող իշխանության թեկնածուն: Այսինքն՝ չնայած ես գործող կառավարության անդամ եմ, բայց շատ հետաքրքիր է, որ իմ շուրջը հավաքված են հիմնականում ընդդիմադիր ուժերը և թավշյա հեղափոխությունից հետո ձևավորված նոր ուժերը: Մենք նաև մեծ աջակցություն ունենք կառավարման համակարգում աշխատող մարդկանցից»:

 

Հարցազրույցն ամբողջությամբ` տեսանյութում:

  • Դիտումներ՝ *