Ադրբեջանական Zerkalo թերթի փոխանցմամբ՝ Թուրքիայի արտգործնախարար Ահմեդ Դավութօղլուն պատրաստվում է այցելել Բաքու՝ փորձելու համար դինամիկա հաղորդել ղարաբաղյան բանակցային գործընթացին.
«Թուրքիան ղարաբաղյան հակամարտության կարգավորմամբ շահագրգռված է ոչ քիչ, քան գերտերությունները։ Բանն այն է, որ այդ հակամարտության կարգավորումը Թուրքիային հնարավորություն կընձեռի թեպետ ոչ մեծ, այնուամենայնիվ քայլ կատարել «զրո խնդիր հարևանների հետ» քաղաքականության իրականացման ուղղությամբ։ Բացի այդ, դրանով էապես կնվազի հայկական հարցի շուրջ պաշտոնական Անկարայի վրա գործադրվող արևմտյան ճնշումը։
Օրեր առաջ Ստամբուլում Դավութօղլուն ԱՄՆ պետքարտուղար Հիլարի Քլինթոնի հետ քննարկել է ղարաբաղյան հակամարտության, ինչպես նաև հայ-թուրքական հարաբերությունների կարգավորման խնդիրները։
Հաշվի առնելով թուրքական շահերը՝ Արևմուտքը փորձում է օգտագործել Ադրբեջանի վրա ազդելու պաշտոնական Անկարայի հնարավորությունները, որպեսզի պաշտոնական Բաքուն բանակցային գործընթացում զբաղեցնի առավելագույն փոխզիջումային դիրքորոշում։
Ինչպես հայտնի դարձավ Թուրքիայի ԱԳՆ տեղեկատվական աղբյուրներից, Դավութօղլուն պատրաստվում է մոտակա օրերին չպլանավորված աշխատանքային այցով ժամանել Ադրբեջան։ Դավութօղլուն փորձելու է առավելագույն կերպ հեշտացնել Ռուսաստանի նախագահ Դմիտրի Մեդվեդևի առաջադրանքը՝ բանակցային գործընթացում բեկում գրանցելու համար, եթե իհարկե պայմանավորվածություն ձեռք բերվի բարձր մակարդակով ղարաբաղյան հակամարտության կարգավորման հերթական եռակողմ հանդիպման անցկացման մասին»։
