Ինչպես հաղորդում է France24 հեռուստալիքը, Չինաստանում կրկին բախումներ են սկսվել էթնիկ ույղուրներով բնակեցված վայրերում: Ինչպես հեռուստաալիքին պատմել են ույղուրների ներկայացուցիչները, Չինաստանի հատուկ ծառայություններն անկարգությունների ժամանակ սպանել են մոտ 20 մարդու, ապա նրանց անվանել են ահաբեկիչներ՝ մեղադրելով ոստիկաններին սպանելու մեջ։
Գերմանիայում գործող՝ ույղուրների համաշխարհային կոնգրեսն իր հայտարարության մեջ նշել է, որ Չինաստանի իշխանությունները ծեծելով սպանել են 14 մարդու, ապա գնդակահարել են ևս 6-ին: «Չինաստանի իշխանությունները պետք է անմիջապես դադարեցնեն համակարգային ճնշումները, որպեսզի կանխվի իրավիճակի հետագա սրացումը»,- ասվում է հայտարարության մեջ: Երկուշաբթի օրը Չինաստանի պետական Xinhua գործակալությունը հաղորդել էր, որ Խոտան քաղաքում մի խումբ գրոհայիններ հարձակվել էին ոտիկանատան վրա և պատանդներ վերցրել: Ըստ գործակալության՝ ամեն ինչ հանգուցալուծվել էր գրոհայինների ոչնչացմամբ:
Հիշեցնենք, որ էթնիկ բախումներն ույղուրներով բնակեցված վայրերում պարբերաբար կրկնվում են: 2009 թ. չինացիների և ույղուրների միջև բախումների հետևանքով զոհվել էր առնվազն 200 մարդ: Անցած ամիս Չինաստանում ծագել էին նաև մոնղոլական բողոքի ակցիաներ:
