Հայաստանում ԱՄՆ դեսպան Լին Թրեյսին փետրվարի 18-ին հանդիպել է նախագահ Արմեն Սարգսյանի հետ: Քննարկված երկկողմ օրակարգից բացի, զրույց է եղել նաև սահմանադրական հանրաքվեի շուրջ, որ նախատեսված է ապրիլի 5-ին: Հատկապես ի՞նչն է հետաքրքրել Հայաստանում ԱՄՆ դեսպանին՝ զրույցի մանրամասներ ներկայացված չեն:
Այն, որ հանրաքվեն Հայաստանի հետհեղափոխական կյանքում, հեղափոխությունից երկու տարի անց բացում է նոր էջ՝ թերևս կասկածից վեր է: Իսկ ահա այն, թե ինչպիսին կլինի այդ էջը, այդքան էլ պարզ չէ: Հավանաբար Հայաստանի արտաքին գործընկերներին, այդ թվում՝ առաջին հերթին Միացյալ Նահանգներին հետաքրքրում է հենց այդ հանգամանքը: Առաջին հերթին Նահանգներին, որովհետև այստեղ խնդիրը բավականաչափ պարզ է՝ Հայաստանը գտնվում է ոչ միայն ներհեղափոխական, այլև, այսպես ասած, արտաքին հեղափոխական միջավայրում: Հեղափոխություն է տեղի ունենում ամբողջ աշխարհում, որն այլ կերպ հնարավոր է գնահատել իհարկե որպես Երրորդ աշխարհամարտ՝ 21-րդ դարին բնորոշ կիրառումներով, կամ նոր աշխարհի ձևավորում: Պարզապես համաշխարհային հեղափոխությունն անարյուն չէ, այլ ուղեկցվում է թեժ կետերով ու պատերազմներով:
Ահա այդ համատեքստում էլ Հայաստանի համար, օրինակ, հույժ կարևոր է, որ չդառնա այդօրինակ կետերից մեկը կամ այդօրինակ կետերին ուղիղ առնչվող սուբյեկտ: Դրա համատեքստում բազմակի է կարևորվում Հայաստանում թավշյա, անարյուն փոփոխության արժեքը: Միացյալ Նահանգների հետ գործակցությունն այդ միջավայրում առաջնային նշանակություն ունի ոչ թե զուտ տարբեր ուժային կենտրոնների հանդեպ վերաբերմունքի, այսպես ասած, դասակարգման, այլ իրական քաղաքականության ռեժիմում պրակտիկ դերակատարման տեսանկյունից: Չի կարող առաջնային չլինել միակ կամ թիվ մեկ գերտերության հետ հարաբերությունն ու փոխադարձ ընկալման միջավայրում գտնվող աշխատանքը, քանի որ համաշխարհային հեղափոխության կամ ժամանակի ու տարածության մեջ ձգվող Երրորդ աշխարհամարտի գործընթացում Նահանգներն է ռեսուրսային առաջատարը և գլոբալ անվտանգության եթե ոչ՝ բացարձակ, ապա գերակա երաշխավորը: Իսկ ներկայումս, երբ անվտանգությունը աշխարհում դարձել է ամենափխրուն հասկացություններից մեկը, այդ հարցում գերակա երաշխավոր պետության հետ գործընկերային ու բարեկամական արդյունավետ աշխատանքը դառնում է չափազանց կարևոր:
Ինչ է առաջարկում Հայաստանը Նահանգներին՝ հանրաքվեից հետո, և ինչ է պատրաստ Հայաստանի հետ քննարկել Նահանգները: Հատկանշական է, որ դեսպանն օրերս հանդիպել էր նաև փոխվարչապետ Տիգրան Ավինյանի հետ: Դրանից հետո նախագահի հետ հանդիպումը հատկանշական է նաև այն իմաստով, թե արդյոք Նահանգները այդ հանդիպումով ձգտել է փոխլրացնե՞լ քննարկումները, թե՞ փոխվարչապետի հետ հանդիպումից հետո առաջացել են հարցեր, որոնք հարկ է եղել հստակեցնել նախագահ Սարգսյանի հետ: