Թայվանում հեռուստասերիալներից և ֆիլմերից սկսել են կտրել-հանել համբույրների և այլ ինտիմ պահերի տեսարանները՝ կորոնավիրուսի տարածման դեմ պայքարելու համար, ինչպես նաև սահմանափակել այդ Էպիզոդները նկարահանումների ժամանակ: Այդ մասին գրել Է Straits Times-ը՝ վկայակոչելով չինալեզու United Daily News-ը։
Չինաստանում հեռուստասերիալների նկարահանումները դադարեցված են նոր կորոնավիրուսի բռնկման պատճառով, պնդում է հրատարակությունը: Թայվանում դրանք շարունակվում են, բայց սահմանափակումներով, ինչպես նկարահանումների ընթացքում, այնպես էլ արդեն եթերում ցուցադրելիս: Այսպես Formosa TV ընկերության Golden City («Ոսկե քաղաք») սերիալում հերոսների համբույրի տեսարանը կրճատվել է մինչև մի ակնթարթից էլ պակաս՝ թեև բնօրինակում համբույրը պետք է ավելի երկար տևեր, իսկ դերասանները պետք է սեփական հույզերի դեմ պայքար ցուցադրեին, գրում է թերթը:
Տեղական Eastern Broadcasting Company հեռուստաընկերությունը, որը նկարահանում է Sweet Family («Սիրելի ընտանիք») սերիալը, հայտարարել է, որ կխուսափի մարդաշատ վայրերում նկարահանումներից, կբացառի բացահայտ ինտիմ տեսարանները և արդեն դիմակներ է պատրաստել նկարահանող խմբերի համար, որոնք դրանք կկրեն աշխատանքի ժամանակ:
Singapore՚s Mediacorp կորպորացիան հայտնել է, որ աշխատանքի ընթացքում կհետևի առողջապահության նախարարության հանձնարարականներին, բայց մրսած դերասաններին չի հարկադրի համբուրվել, հաղորդել է «Ինտերֆաքս»-ը: