«Էրեբունի» հյուրանոցի Հանրային խորհրդի նիստերի փոքր սրահում Հայ ազգային կոնգրեսի և իշխող կոալիցիայի` մոտ երկու ժամ տևած հանդիպումից հետո Հայ ազգային կոնգրեսի համակարգող Լևոն Զուրաբյանը լրագրողներին ասաց.
«Մենք առաջարկում ենք Հայաստանում շուտափույթ կերպով լեգիտիմ իշխանության ձևավորումը, այն է` նախագահական և խորհրդարանական ընտրությունների անցկացումը: Դա այն լուծումն է, որ մենք բերում ենք բանակցությունների սեղանին, բայց մենք նաև համաձայնել ենք, որ կա կողմերի իրավահավասարություն, և նրանք էլ կարող են բերել իրենց լուծումները: Նրանք հիմա դեռ քննարկման համար որևէ լուծում բանակցությունների սեղանին չեն դրել: Երբ որ դա լինի, մենք բոլոր այդ լուծումները կքննարկենք: Մեր տեսակետը անփոփոխ է` խնդիրը կարող է կարգավորվել միայն նախագահական և խորհրդարանական ընտրություններով: Ինչ վերաբերում է երկխոսության զարգացմանը, եթե դա կարելի է երկխոսություն համարել, որովհետև մենք եկել էինք այս հանդիպմանը, և մենք համարում էինք, որ սա այն ձևաչափը չէ, որով կարելի է ծավալել արդյունավետ երկխոսություն: Սակայն նրանց պատվիրակության կողմից եղան հայտարարություններ, որոնք մեզ համար բացահայտեցին նոր հանգամանքներ, այսինքն` իրականում, որ նրանք ունեն շատ ավելի լայն լիազորություններ, և մենք սպասում ենք այդ լիազորությունների մասին նրանց հստակ հայտարարություններին»:
Կոնգրեսի համակարգողը նաև հավելեց. «Մենք ասել ենք, որ եթե մինչև սեպտեմբեր արդյունք չլինի արտահերթ ընտրությունների վերաբերյալ կողմնորոշվելու հարցում` մենք կհամարենք երկխոսության հնարավորությունը սպառված, հանդիպմանն էլ մենք այդ մասին հայտարարել ենք»:
