Թբիլիսիից ոչ հեռու գտնվող Մարտկոպի մենաստանի խցերից մեկում հայտնաբերվել է Ռուսաստանի քաղաքացու դի՝ մարմնի վրա դանակահարության հետքերով։ Այս մասին հաղորդում է «Ինտերֆաքսը»՝ հղում անելով տեղական ԶԼՄ-ներին։
Նշվում է, որ Ռուսաստանի քաղաքացին արդեն մոտ մեկ տարի ապրել է այս մենաստանում։ Ենթադրվում է, որ նրան կարող էր սպանել տղամարդը, որը պարբերաբար եկել է մենաստանում ապրելու և ռուսաստանցու հետ միևնույն խցում է մնացել։
Վրաստանի ՆԳՆ-ում հավելել են, որ սպանության դեպքի կապակցությամբ արդեն քրեական գործ է հարուցվել։
Մենաստանի վանահոր՝ հայր Վենիամինի խոսքերով, սպանվածի անունը Իգոր է եղել։ Նա Մոսկվայից էր եկել և 50 տարեկան էր։
«Նա առողջական խնդիրներ ուներ, թոքերն էին անհանգստացնում։ Այստեղ օդը մաքուր է, նա բուժվում էր և աղոթում։ Իսկ ենթադրյալ մարդասպանը մինչ այդ դատվածություն է ունեցել, նաև հոգեկան խանգարում ունի և բանտում ավելի քան 18 տարի է անցկացրել,- հավելել է հայր Վենիամինը։