Առողջապահության նախարարությունը դրական է գնահատում գլխուղեղի սուր իշեմիկ կաթվածի բուժման ծրագրի արդյունքները:ՀՀ առողջապահության նախարարության Բժշկական օգնության քաղաքականության վարչության հիվանդանոցային բժշկական օգնության քաղաքականության բաժնի գլխավոր կազմակերպիչ Արմինե Աղաջանյանը, ամփոփելով ծրագրի մեկ տարվա արդյունքները, նշեց, որ արդեն անվճար սպասարկել են 403 հիվանդի:
«Հիվանդները պետք է համապատասխանեն ծրագրի չափանիշին, այն է ՝ քաղաքացու մոտ գլխուղեղի սուր իշեմիկ կաթված ախտորոշումը, ընդ որում, դա 0-24 ժամվա ընթացքում, ներառյալ տեղափոխման ժամանակահատվածը: Եթե քաղաքացին ընդգրկվում է ծրագրում, ապա անվճար փոխհատուցվում է, տրամադրվում է անհրաժեշտ միջոցառումների ամբողջ ծավալը»,-ասաց Արմինե Աղաջանյանը:
Նախարարությունը ծրագրի համար 2019 թվականին նախատեսել էր 300 մլն դրամ, սակայն ծախսվել է 675 մլն դրամ: Դա նշանակում է, որ պահանջարկի դեպքում նախարարությունը պատրաստ է ավելացնել ֆինանսավորումը: 2020 թվականի համար նախատեսվել է 650 մլն դրամ, սա ևս նախնական է, անհրաժեշտության դեպքում կավելացվի:
Հայաստանի Հանրապետությունում գլխուղեղի կաթվածի բուժման արդյունավետության բարձրացման և կառավարման համակարգող խորհրդի նախագահ Նունե Եղիազարյանի խոսքով, իրենք հիվանդին ծրագրով բուժծառայություններ են մատուցում՝ առանց նայելու բյուջեն շրջանցել են, թե ոչ:
«Նման ցուցում չկա, սպասարկում ենք բոլոր նրանց, ովքեր համապատասխանում են ծրագրի չափանիշին, անվճար տրամադրվում են բոլոր ծառայությունները: Մենք ունենք ուղեցույց և դրանով էլ առաջնորդվում ենք»,-ասաց Նունե Եղիազարյանը:
Բանախոսներն ընդգծեցին՝ առաջիկայում նախարարությունը նախատեսում է ընդլայնել ծրագիրը: Մասնավորապես, ավելացնել այն հիվանդանոցների թիվը, որոնք կարող են սպասարկել գլխուղեղի կաթվածի բուժման ծրագիրը: Դրա համար նախատեսված է մասնագետների վերապատրաստման լայն ծրագիր:
Նունե Եղիազարյանն ասաց, որ նկատվում է կաթվածով հիվանդների թվի ավելացում: Ներկայացնելով Էրեբունի բժշկական կենտրոնի տվյալները՝ նա նշեց, որ եթե նախկինում այդ ախտորոշմամբ բուժում էին տարեկան 600-800 հիվանդի, ապա 2019 թվականին գրանցվել է այդպիսի 2347 հիվանդ, որից 1712-ը եղել է իշեմիկ կաթված: Մասնագետը նկատեց, որ նվազել է կաթվածի մահացության ցուցանիշը, մասնավորապես, եթե նախկինում տարեկան կտրվածքով այդ ցուցանիշը կազմում էր 25 տոկոս, ապա ներկայում իջել է 17-18 տոկոսի:
https://www.youtube.com/watch?v=vj1IBmdSYt8
