Грузия Online-ի փոխանցմամբ՝ Վրաստանի փոխարտգործնախարար Նինո Կալանդաձեն մեկնաբանել է Եվրախորհրդարանի նախագահ Ժոզե Մանուել Բառոզուի նամակը, որը նա ուղարկել է «Համերաշխություն անօրինական բանտարկյալներին» կազմակերպությանը։ Իր նամակում Բառոզուն խնդրել է օբյեկտիվ հետաքննություն անցկացնել մայիսի 26-ին Թբիլիսիում չարտոնյալ ցույցի ցրման կապակցությամբ։
Կալանդաձեի խոսքերով՝ Վրաստանի շահերից են բխում նմանատիպ խորհուրդները. «Վրաստանն ակնդետ լսում է նմանատիպ խորհուրդները և հաշվի առնում դրանք։ Դրանք հայտնի են նաև իշխանություններին, և իրավապահներն արդեն արձագանքել են համապատասխան ձևով։
Վրաստանի շահերից է բխում այն, որ բոլոր խնդրահարույց և իրավախախտման հետ կապված փաստերն ամբողջովին և ադեկվատ հետաքննվեն»։
Հիշեցնենք, որ մայիսի 25-ի լույս 26-ի գիշերը Թբիլիսիի կենտրոնում վրացական ընդդիմության ցույցի ցրման ժամանակ ձերբակալվել էր 105 մարդ, տուժել էին տասնյակ անձինք, զոհվել էր 4 մարդ, անհայտ էր մնացել ավելի քան 40 մարդու ճակատագիրը։
Ի դեպ, վրացական ընդդիմությունը ներկայումս ձեռնամուխ է եղել այդ ցույցի ցրման մասին ֆիլմի նկարահանմանը, որպեսզի ողջ աշխարհն իմանա ճշմարտությունը։
