Այսօր՝ հունվարի 21-ին, Ազգային ժողովում Քրեական ենթամշակույթի մասին օրենքի նախագծի քննարկումն անցել է լարված մթնոլորտում: ԱԺ նախագահը ստիպված է եղել արգելել ԲՀԿ չորս պատգամավորի մասնակցությունը ԱԺ նիստին:
Այս մթնոլորտը բավականին նշանային է Հայաստանում ներքաղաքական իրողությունների ֆոնին: Արդյոք ԲՀԿ-ն պայքարում է այդ օրինագծի՞ դեմ, թե՞ իրականում պայքարում է ներքաղաքական հեռանկարում իր տեղը պահպանելու հնարավորության համար: Չմոռանանք՝ հեղափոխությունից հետո դեռևս ԲՀԿ-ի առջև մնում է նախկին համակարգից տարանաջատվելու բարդ խնդիրը:
Թեմայի շուրջ «Առաջին լրատվական»-ի հետ քննակմանը մասնակցեցին վերլուծաբան Հակոբ Բադալյանը, կառավարման փորձագետ Սերոբ Անտինյանը և «Իմ քայլը» խմբակցության պատգամավոր Միքայել Զոլյանը:
«ԲՀԿ-ն նախկին համակարգում և այդ համակարգին բնորոշ արժեհամակարգային տիրույթում ձևավորված ուժ է. ԲՀԿ-ն հենվել է ոչ միայն սոցիալական օժանդակության կարիք ունեցողների վրա, այլ նաև քրեական ենթամշակույթը կրող շրջանակների, և քրեական ենթամշակույթի դեմ պայքարն առնվազն կարող է առնչվել ԲՀԿ սոցիալական հենարանների որոշ մասին: Այս տեսանկյունից հասկանալի է ԲՀԿ-ի անհանգստությունը»,- ընդգծեց Հակոբ Բադալյանը՝ հավելելով, որ նախկին իշխանությունների համակարգային վերարտադրությանը նպաստող կարևոր օղակներից մեկը եղել են քրեական մշակույթ կրող շրջանակները: Վերլուծաբանի դիտարկմամբ՝ ԲՀԿ-ն նախկին իշխանությունների Փակ բաժնետիրական ընկերությունն էր:
«Այն, ինչ այսօր տեղի ունեցավ ԱԺ-ում, ծանր տպավորություն է թողնում ընտրողների մոտ. այսպիսի քայլերի հետևանքով ամբողջ խորհրդարանն է տուժում»,- նշեց Միքայել Զոլյանը՝ հավելելով, որ այն հանգամանքը, որ այսպիսի բուռն արձագանք առաջացավ, վկայում է այն մասին, որ քննարկվող օրինագիծը կարևոր է: «Ոմանց շահերը վտանգվում են այս օրենքով, բայց թե՛ կառավարությունը, թե՛ «Իմ քայլը» վճռականություն ունեն մինչ վերջ գնալու»:
Սերոբ Անտինյանի դիտարկմամբ՝ այս ամենն ունի խորքային հիմքեր: «Հանրային կառավարումը տեղի է ունենում ֆորմալ ինստիտուտների՝ օրենսդրական կարգավորումների և ոչ ֆորմալ ինստիտուտների եղանակով… Նախկին համակարգում քրեական մշակույթը և քրեական տարրերն իրենց դերով շատ ազդեցիկ էին՝ ո՞վ էր հարց լուծողը, ո՞վ էր որոշում կայացնողը, ո՞ւմ հետ էին հաշվի նստում: Պետք է քաղաքական կամք դրսևորել և մեր հասարակական հարաբերությունները տանել դեպի ինստիտուցիոնալացում, և այդ դեպքում կունենանք իրավակարգ և օրինականություն»,- նշեց Ս. Անտինյանը:
Մանրամասն՝ տեսանյութում: