Ադրբեջանի Նավթային պետական ընկերության պաշտոնական ներկայացուցիչ Իբրահիմ Ահմեդովը հայտարարել է Բելառուսին նավթ մատակարարելու հնարավորության մասին, հաղորդում է ՌԻԱ «Նովոստին»։
«Սրա վերաբերյալ բանակցություններ են տարվել և մենք սկզբունքորեն պատրաստ ենք, կարող ենք առաջվա պես մատակարարել։ Մենք ունենք, ինչպես գիտեք, Azeri-light նավթը, սակայն որևէ կոնկրետ բան սրա վերաբերյալ դեռևս չկա»,- ասել է Ահմեդովը։
Ավելի վաղ Բելառուսի փոխվարչապետ Դմիտրի Կրուտոյը հայտարարել էր, որ հույս ունի նավթի ներկրման վերաբերյալ շուտափույթ պայմանավորվածության հասնել, որը կփոխարինի ռուսական նավթին։ Նա նշել էր, որ այդ թվում քննարկվում է նաև Ադրբեջանից նավթ ներկրելու տարբերակը։
Հիմա Բելառուսը միայն ռուսական նավթ է գնում, սակայն երկրի նախագահ Ալեքսանդր Լուկաշենկոն, Մինսկի և Մոսկվայի միջև նավթի սակագների վերաբերյալ պայմանավորվածության չգալու ֆոնին հայտարարել էր, որ երկրին նավթի մի քանի մատակարար է անհրաժեշտ։