«Փաստաբանական, իրավաբանական ծառայություններ մատուցող ընկերությունների վերաբերյալ ՊԵԿ-ը մշտապես իրականացրել և իրականացնելու է հսկողական աշխատանքներ»,- «Առաջին լրատվական»-ին փոխանցեցին ՊԵԿ լրատվականից՝ պատասխանելով հարցին, թե արդյոք հարկային մարմինները ստուգումներ իրականացնո՞ւմ են փաստաբանական գրասենյակներում, թե՞ ոչ, և ի՞նչ նպատակ են հետապնդում այդ ստուգումները։ ՊԵԿ-ից նաև հավելեցին, որ որևէ ուղղորդված վերահսկողության կամ ոլորտի թիրախավորման մասին խոսք լինել չի կարող։ «Ստուգումներն իրականացվում են վերլուծությունների արդյունքում ռիսկեր հայտնաբերված հարկ վճարողների նկատմամբ, և դա համընդհանուր մոտեցում է»,- փոխանցեցին ՊԵԿ լրատվականից։
Նշենք, որ մամուլում հրապարակումներ եղան, որ Պետական եկամուտների կոմիտեն մտնում է փաստաբանների գրասենյակներ, ստուգում է փաստաբանների գործունեությունը՝ փորձելով պարզել, թե վերջիններս ինչ աշխատանքներ են արել, ինչ գործեր են քննել և այդ ծառայությունների դիմաց որքան գումար են ստացել:
«Առաջին լրատվական»-ը փորձեց նաև Փաստաբանների պալատից պարզաբանում ստանալ, թե արդյոք փաստաբանները դժգոհե՞լ են իրականացված ստուգումներից։ Պալատի խոսնակ Հայկ Հակոբյանը մեզ հետ զրույցում ասաց, որ ՀՀ փաստաբանների պալատի և ՊԵԿ-ի միջև ստորագրված հուշագրի համաձայն՝ ՊԵԿ-ը գրավոր կարգով պետք է իրազեկի Փաստաբանների պալատին, եթե ստուգում է իրականացնում անհատ ձեռնարկատեր փաստաբանի կամ փաստաբանական կազմակերպության մոտ: Փաստաբանների պալատն էլ փաստաբաններին հորդորել է հաշվարկել և վճարել հարկերը, քանի որ դա փաստաբանի անկախության կարևոր երաշխիքներից մեկն է: Դա կարող է առիթ հանդիսանալ, որպեսզի պետական մարմինը փաստաբանի նկատմամբ ճնշում գործադրի:
«Մենք 2018-2019 թվականներին որևէ փաստաբանի կամ փաստաբանական կազմակերպության մոտ ստուգում անցկացնելու մասին ՊԵԿ-ից գրություն չենք ստացել: Եթե նման դեպքեր եղել են, ապա Փաստաբանների պալատին այդ դեպքերը շատ են հետաքրքրում։ Բացի դրանից, Փաստաբանների պալատը փաստաբանների մասնագիտական գործունեության նյութական արդյունքների վերաբերյալ որևէ տեղեկատվություն չի հավաքագրում և այդպիսով չի կարող տեղեկատվության տիրապետել»,- ասաց Հակոբյանը։
Ի դեպ, Պալատի խոսնակը նշեց, որ մամուլի հրապարակումների համաձայն՝ նմանատիպ ստուգումներ իրականացվել են նաև Փաստաբանների պալատում, սակայն այդ տեղեկությունները նույնպես իրականությանը չեն համապատասխանում։
«Փաստաբանների պալատում ՊԵԿ-ն այս պահին ստուգումներ չի իրականացնում: Այդ տեղեկատվությունը չի համապատասխանում իրականությանը»,- ասաց Հակոբյանը։
Հիշեցնենք, որ անցած տարի, երբ քննարկվում էր «Հարկային օրենսգրքում փոփոխություններ և լրացումներ կատարելու մասին» օրենքի նախագիծը, նախագծի դրույթներից մեկը փաստաբանական և հաշվապահական ծառայություններ մատուցող ընկերություններում դժգոհություն էր առաջացրել: Օրինակ՝ փաստաբանները, հաշվապահները, խորհրդատվական ծառայություններ մատուցողները, ըստ այդ նախագծի, 5 տոկոս շրջանառության հարկից անցնելու էին 20% ավելացված արժեքի հարկման դաշտ: Նախագծի քննարկվող դրույթի ընդունման արդյունքում, ինչպես վստահեցնում էին շահառուները, իրենց ծառայությունների գինը կբարձրանար, և ոլորտում ստվերը կմեծանար, ու այս դրույթը բացասական էր ազդելու փոքր ու միջին ձեռներեցների գործունեության վրա: Բավական երկարատև և բուռն քննարկումներից հետո, սակայն, այդ դրույթը կյանքի չկոչվեց։
Ամեն դեպքում, հաշվի առնելով նախկին իշխանությունների բարձրաստիճան պաշտոնյաների դեմ հարուցված քրեական գործերը և այդ գործերի շրջանակներում ընդգրկված տասնյակ փաստաբանների ներգրավվածությունը ու նրանց վճարվող ահռելի գումարները, կարելի է նշել, որ ողջամիտ է ՊԵԿ-ի ուշադրությունը ոլորտի նկատմամբ, որպեսզի որոշ փաստաբաններ կարճ ժամանակում չդառնան միլիոնատերեր՝ չվճարելով համապատասխան հարկերը։
