«Հաղթանակ» զբոսայգում՝ «Գոլդըն փելըս» հյուրանոցային համալիրի հետնամասում, ծառեր են հատվում, և ակտիվ շինարարական աշխատանքներ են սկսվել, որ իրականացնում է «Գոլդըն փելըս» հյուրանոցի տնօրինությունը:
Երգիչ Արթուր Իսպիրյանը մտահոգված է այգու ճակատագրով, նշում է՝ այգու առնվազն 1000 քմ-ը կսեփականաշնորհեն, անունը կդնեն` բարեկարգում: «Սա կդառնա տենդենց, որ մյուս կողմերում հյուրանոցային համալիրներ կառուցեն: Այգին վերանում է փաստորեն: Եթե առջևի հատվածով զբոսնում ենք, տեսնում` ամեն ինչ լավ է, կարգին, սովորական այգի է, ապա ներսում տեսնում ենք, որ այն լիովին վերանում է»,- ասաց նա:
Իսպիրյանն ուշադրություն հրավիրեց այգում կուտակված աղբի վրա՝ ասելով, որ իրեն ներկայացնում են, թե դա տարիների կուտակում է, այստեղ եղել են հասարակական զուգարաններ:
«Փաստորեն, սա այգու Սովետաշենն է: Նրանց հայրենիքը միայն ցանկապատի ներսում է: Ցանկապատից դուրս իրենց հայրենիքը չի: Սա Երևանի ամենամեծ այգին է, որ պիտի առնվազն երեսուն աշխատող ունենա: Երկար տարիներ խնդրելուց հետո վերջապես պոմպ դրվեց, որ ոռոգման համար ջուր օգտագործվի»,- ասաց նա:
Այգու սալահատակները փոխված չեն, անմխիթար վիճակում են, ողջ այգու հսկողության պատասխանատվությունը դրված է ընդամենը 8 աշխատակցի ուսերին, մինչդեռ առնվազն 15 հոգու աշխատանք է պահանջվում:
Հյուրանոցի ընդլայնման իրենց նպատակների մասին նրանք հայտնել էին դեռևս անցած տարի, երբ հերթական անգամ բարձրաձայնվեց, որ զբոսայգում ծառեր են հատվում: Այդ ժամանակ, սակայն, հյուրանոցի տնօրինությունը հավաստիացրել էր, որ իրենք պարզապես ուսումնասիրում են տարածքը, հյուրանոցի հետնամասի գրունտի ամրությունը: Իսկ որևէ շինարարական աշխատանք կատարելուց առաջ իրենք օրենքով սահմանված բոլոր փաստաթղթերը, թույլտվությունները կստանան, հետո նոր կսկսեն աշխատանքները:
Փաստորեն, հյուրանոցի տնօրինության հավաստիացումները ընդամենը հասարակությանը հանգստացնելու նպատակ էին հետապնդում: Մեկ տարի անց արդեն սկսվել են ակտիվ շինարարական աշխատանքներ:
