Արևմուտքը վերջնականապես մերժել է Ռուսաստանի հետ համատեղ հակահրթիռային պաշտպանության համակարգ ստեղծելու ՌԴ նախագահի առաջարկը, որով նախատեսվում էր ՆԱՏՕ-Ռուսաստան տարածքը բաժանել պատասխանատվության հատվածների: Այս մասին այսօր գրում է ռուսական Коммерсант-ը: «ՀՕՊ հատվածային բաժանումն այլևս չի քննարկվում»,- թերթին ասել է բանակցություններին մասնակցած ռուսաստանցի պաշտոնյան:
Նա նաև հավելել է, որ Մոսկվան այժմ որոշում է, թե ինչ դիրքորոշում է ունենալու ՀՕՊ-ի վերաբերյալ, և այդ որոշումը պետք է կայացնի մինչև 2012թ. մայիս, երբ ամերիկյան Չիկագո քաղաքում կկայանա ՆԱՏՕ-ի գագաթնաժողովը. «Քաղաքական առումով պետք է կողմնորոշվել մինչև Չիկագոյի գագաթնաժողովը: Եթե մենք, իհարկե, մեկնենք այնտեղ»,- ասել է դիվանագետը:
Մեդվեդևի առաջարկի մերժումը հաստատել են նաև ՆԱՏՕ-ի կենտրոնական գրասենյակում: «Մենք վաղուց էինք ասում Մոսկվային, որ պատրաստ չենք ՀՕՊ-ի հատվածային բաժանմանը: Դաշինքը չի կարող իր անդամների անվտանգությունը վստահել արտաքին խաղացողներին»,- ասել են այնտեղ: Այս դիրքորոշումը հստակ ներկայացվել է ինչպես Սոչիում հունիսի 4-ին կայացած ՆԱՏՕ-Ռուսաստան գագաթնաժողովի, այնպես էլ Վաշինգտոնում Ռուսաստանի արտգործնախարար Սերգեյ Լավրովի այցելության ժամանակ:
Коммерсант-ը գրում է, որ այժմ Կրեմլը հույս ունի մինչև 2012թ. մայիսը պայմանավորվել Դաշինքի հետ այլ ֆորմատով ՀՕՊ իրականացնելու մասին կամ ստանալ նրանից երաշխիքներ, որ եվրոպական այդ համակարգն ուղղված չի լինելու Ռուսաստանի դեմ: ՆԱՏՕ-ում թերթի աղբյուրն ասել է, որ Ռուսաստանը քիչ հնարավորություններ ունի նմանատիպ երաշխիքներ ստանալու համար: