ՀՀ փոխվարչապետ, տարածքային կառավարման նախարար Արմեն Գևորգյանն այսօր աշխատանքային այցով եղել է Լոռու մարզում:
Վանաձորում մարզպետարանի ակտիվի, մարզային իրավապահ մարմինների ղեկավարների, քաղաքապետերի մասնակցությամբ անցկացվել է խորհրդակցություն, որտեղ քննարկվել են մարզային ընթացիկ խնդիրներին վերաբերող հարցեր:
Փոխվարչապետին են ներկայացվել մարզպետարանի ընթացիկ գործունեության հետ կապված հարցերը, մարզում առկա օպերատիվ իրավիճակը: Մարզպետարանի և համայնքների ղեկավարները տեղեկացրել են մարզի առաջնահերթ խնդիրների լուծման ծրագրով համայնքներում իրականացվող աշխատանքների ընթացիկ վիճակը, համայնքային եկամուտների հավաքագրման ցուցանիշները, ինչպես նաև ներկայացվել է տեղեկատվություն գյուղատնտեսական աշխատանքների վերաբերյալ:
Ա.Գևորգյանը կարևորել է տարածքային և տեղական, ինչպես նաև պետական բոլոր կառույցների անխափան գործունեության ապահովումը՝ հորդորելով ամենօրյա ուշադրության կենտրոնում պահել ընթացիկ խնդիրների լուծումը, աշխատանքներն իրականացնել բնականոն հունով:
Այնուհետև փոխվարչապետն այցելել է Վանաձորի թիվ 13 դպրոցի և Վանաձորի արվեստի քոլեջի շինհրապարակներ, տեղում ծանոթացավ շինարարական աշխատանքների ընթացքին: Մարզի առաջնահերթ խնդիրների լուծման ծրագրով կրթօջախներին հատկացվել է համապատասխանաբար շուրջ 50 մլն և 35 մլն դրամ: Տեղեկացվել է, որ արվեստի քոլեջում աշխատանքները կավարտվեն այս տարի, իսկ թիվ 13 դպրոցի հետ կապված՝ քննարկվել է դպրոցի ամբողջական վերանորոգման համար անհրաժեշտ գումարները կամ առաջնահերթ խնդիրների լուծման երկրորդ ծրագրում, կամ այլ ծրագրերում ներառելու հնարավորությունը:
Ա.Գևորգյանը հանձնարարել է անմիջական ուշադրության տակ պահել մարզում իրականացվող ծրագրերի՝ որակյալ և ըստ ժամանակացույցի իրականացումը:
