Իսրայելի նախագահ Ռեուվեն Ռիվլինը կոչ է արել պայքարել հակասեմականության դեմ՝ խիստ դատապարտելով շաբաթ երեկոյան Նյու Յորք նահանգի Մոնսի քաղաքի սինագոգի մոտակայքում դանակով հարձակումը. ըստ նախնական տվյալների՝ հինգ մարդ վիրավորվել է, հայտնում է ՏԱՍՍ-ը:
«Ես ցնցված և վրդովված եմ Նյու Յորքի սարսափելի հարձակումից և աղոթում եմ բոլոր տուժածների առողջության համար»,- գրել է Իսրայելի նախագահը կիրակի օրը՝ Twitter-ի իր էջում:
Ռիվլինը շեշտել է, որ հակասեմականության խնդիրը սպառնում է ամբողջ աշխարհին և կոչ է արել համախմբվել՝ այն լուծելու համար: «Հակասեմականությունը միայն հրեական և, առավել ևս միայն Իսրայելի պետության խնդիրը չէ,- ասաց նա:- Մենք պետք է համախմբվենք՝ պայքարելու համար այս չարիքի տարածման դեմ, ինչը գլոբալ սպառնալիք է»:
Դեկտեմբերի 28-ին Նյու Յորքի արվարձանային Մոնսի քաղաքի սինագոգի շենքի մոտ դանակահարության հետևանքով մի քանի մարդ վիրավորվել է, հայտնում է Fox News-ը՝ վկայակոչելով ականատեսներին:
