Ադրբեջանական APA լրատվական գործակալության փոխանցմամբ՝ ԵԱՀԿ Մինսկի խմբի համանախագահներ Ռոբերտ Բրադկեն (ԱՄՆ), Բեռնար Ֆասիեն (Ֆրանսիա) և Իգոր Պոպովը (Ռուսաստան), վերջացնելով իրենց ադրբեջանական այցը, այսօր մեկնել են Երևան, ուր և վաղը կանցկացնեն պաշտոնական հանդիպումներ։
Բաքվի միջազգային օդանավակայանում Ֆասիեն լրագրողներին հայտնել է, որ քանի դեռ իրենց տարածաշրջանային շրջագայությունն ավարտված չէ, իրենք չեն կարող ոչինչ հայտնել Բաքվում անցկացրած հանդիպումների մասին։ Ֆասիեն հավելել է, որ այդպիսի հայտարարությամբ համանախագահները հանդես կգան միայն իրենց տարածաշրջանային այցի ավարտից հետո։
Ֆասիեն նաև հիշեցրել է, որ համանախագահներն այս շաբաթվա սկզբին հանդիպումներ են ունեցել ԵԱՀԿ գործող նախագահ, Լիտվայի արտգործնախարար Աուդրոնյուս Աժուբալիսի և Ռուսաստանի արտգործնախարար Սերգեյ Լավրովի հետ՝ ստանալով նրանց աջակցությունը։
Մինսկի խմբի ամերիկացի համանախագահ Ռոբերտ Բրադկեն իր հերթին հայտարարել է, որ ԱՄՆ-ը հավատարիմ է խաղաղության գործընթացին և ջանքեր է գործադրելու այդ ուղղությամբ։
