ԵՄ արտաքին քաղաքականության և անվտանգության հարցերով գերագույն ներկայացուցիչ Քեթրին Էշթոնն անհանգստություն է հայտնել Ուկրաինայի արևելքում մարդկանց առևանգումների, կտտանքների և սպանությունների դեպքերի առթիվ և ապօրինի անջատողական զինված խմբավորումներին կոչ է արել զենքը վայր դնել, ինչպես հայտնում է ՈՒՆԻԱՆ-ը՝ այս մասին ասվում է Էշթոնի հայտարարության մեջ:
«Ուկրաինայի վերաբերյալ ապրիլի 17-ի ժնևյան հայտարարության տակ ստորագրած բոլոր կողմերը պետք է ամեն ինչ անեն՝ դրա պայմաններն իրագործելու համար, ներառյալ՝ անօրինական զինված միավորումների նկատմամբ ազդեցության լծակներն օգտագործելով, որոնք նրանց կստիպեն դադարեցնել բռնությունն ու պրովոկացիաները, զենքը վայր դնել: «Արևելյան Ուկրաինայից վերջին նորությունները և հատկապես՝ առևանգման, կտտանքների և սպանության մասին հաղորդագրությունները, այդ թվում՝ Վլադիմիր Ռիբակի և Պավել Կովելկոյի դեպքերը, լուրջ անհանգստություն են առաջացնում»,- ասվում է Էշթոնի հայտարարության մեջ:
Էշթոնը նաև այդ մահերի անկախ հետաքննության և մեղավորներին պատասխանատվության ենթարկելու կոչ է արել:
«Բոլոր մարդիկ, ում անօրինաբար պահում են զինված խմբերը, լինեն՝ լրագրողներ, տեղի ակտիվիստներ կամ սովորական քաղաքացիներ, պետք է անմիջապես ազատ արձակվեն: Ես կոչ եմ անում վերջ դնել բռնությանը, ահաբեկություններին և պրովոկացիոն գործողություններին ու հայտարարություններին, ինչպես նախատեսված է ժնևյան համաձայնությամբ»,- նշել է Էշթոնը:
