Ստամբուլում երեկ տեղի է ունեցել Լիբիայի հարցով համակարգող խմբի հերթական համաժողովը, որի ժամանակ խմբի անդամ մոտ 40 երկրներ ճանաչել են Բենղազի քաղաքում ապստամբների կողմից հիմնված Ազգային անցումային խորհուրդը որպես «Լիբիայի միակ լեգիտիմ իշխանություն»: Ըստ Reuters գործակալության հաղորդման՝ այս մասին երեկ հայտարարել է Ֆրանսիայի արտաքին գործերի նախարար Ալեն Ժյուպեն:
«Քանի դեռ գոյություն ունի ժամանակավոր իշխանությունը, Միացյալ Նահանգները ճանաչելու է Ազգային խորհուրդը որպես Լիբիայի օրինական կառավարություն, և մենք կհամագործակցենք նրանց հետ»,- ասել է ԱՄՆ պետքարտուղար Հիլարի Քլինթոնը: Վերջնական փաստաթղթում նշվել է ինչպես այս դրույթը, այնպես էլ Քադաֆիի հեռանալուց հետո Լիբիայում կարգավորման մեխանիզմները: Ընդդիմադիրների պաշտոնական ճանաչումը կօգնի Միացյալ Նահանգներին իրականացնել ընդդիմության ֆինանսավորումը:
