Երևանի ավագանու «Լույս» խմբակցությունը շեղվում է «Լուսավոր Հայաստան» կուսակցության գծից. այս մասին լրագրողների հետ հանդիպմանը հայտարարել են կուսակցության նախագահ Էդմոն Մարուքյանը և կուսակցության անդամ Մանե Թանդիլյանը: Թեմայի շուրջ զրուցելու համար «Առաջին լրատվական»-ը հյուրընկալել է քաղաքագետ, «Ժողովրդավարական համախմբում» նախաձեռնության համահիմնադիր Սուրեն Պետրոսյանին և քաղաքագետ Աղասի Մարգարյանին:
Աղասի Մարգարյանը տարօրինակ է համարում, որ «Լուսավոր Հայաստանը» ցավով է ընդունում «Լույս» խմբակցության նկատմամբ հնչեցված քննադատությունը. «Այդ մասին պետք էր մտածել ավելի վաղ՝ մինչ խմբակցություն ձևավորելը և Երևանի ավագանու ընտրություններին դաշինքով գնալը»:
Նա տարօրինակ է համարում նաև «Լույս» խմբակցության և «Լուսավոր Հայաստան» կուսակցության հարաբերությունները. «Կուսակցությունը պետք է պատրաստ լինի հարվածներին դիմակայելու: Ցանկալի է, որ ձևավորվի քաղաքական պատասխանատվության մշակույթը»:
Անդրադառնալով Երևանու ավագանու «Լույս» խմբակցության անդամ Դավիթ Խաժակյանին հետ կանչելու կուսակցության որոշմանը՝ Աղասի Մարգարյանը նշեց. «Ես չգիտեմ՝ ավելի ճիշտ է նրան հետ կանչե՞լը, թե՞ խմբակցությունն ավելի բարձր նշաձողի բերելը»:
Սուրեն Պետրոսյանն էլ կարծում է, որ հաճախ ամենաթողությունը և անպատասխանատվությունը բնորոշվում են որպես ժողովրդավարություն. «Իրականում ընդդիմությունը իշխանության հայելային արտապատկերումն է»:
Համեմատելով նախկին և ներկա իշխանությունները՝ քաղաքագետը նշեց. «Եթե նախկին իշխանությունները տենչում էին ունենալ, իշխում էր ունենալու ոգին, ներկա իշխանությունների մեջ իշխում է թվալու ոգին. բոլորը փորձում են թվալ, այլ ոչ երբեք՝ լինել. փորձում են թվալ ավելի լիբերալ, ավելի ժողովրդավար, սակայն իրականում որևէ մեկը դրա կրողը չէ»:
Հարցազրույցն ամբողջությամբ՝ տեսանյութում: