Գեղարքունիքի մարզի ընդհանուր իրավասության դատարանում Վահագն Մելիքյանի նախագահությամբ ավարտվել է Վահե Գ.-ի և Դավիթ Կ.-ի գործի դատական քննությունը:
Դեպքի պահին Վահեն ու Դավիթը դեռ անչափահաս էին՝ 17 տարեկան:
Նրանց մեղադրանք էր առաջադրված նախնական համաձայնությամբ խմբի կազմում ավազակությամբ զուգորդված սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ, 8-րդ կետերով: Նրանք արգելանքի տակ են 2016 թվականի փետրվարի 26-ից:
Ըստ դատական ակտի՝ Վահե Գ.-ն ու Դավիթ Կ.-ն նախնական համաձայնության են եկել Շուշանիկ Գ.-ին կյանքից զրկելով՝ նրա գույքը հափշտակելու շուրջ: Կատարվել է դերաբաշխում:
2016 թվականի փետրվարի 23-ին, ժամը 13-ի սահմաններում Վահեն ու Դավիթը հեռուստացույցի մալուխը կարգի բերելու պատրվակով գնացել են Գեղարքունիքի մարզի բնակչուհի, իրենց համագյուղացի Շուշանիկ Գ.-ի տուն, որտեղ՝ տան տանիքում հարձակվել են տանտիրուհու վրա: Վահեն իր հետ նախապես վերցրած պարանը գցել է Շուշանիկի պարանոցին, սկսել է խեղդամահ անել: Դավիթը, լրացնելով Վահեի գործողությունները, տանիքից վերցրել է 54 սմ երկարությամբ մետաղե խողովակ, դիտավորյալ երեք անգամ հարվածել է տուժողի գլխին, ինչի հետևանքով Շուշանիկ Գ.-ի առողջությանը պատճառվել է ծանր վնաս: Կինը կորցրել է գիտակցությունն ու ընկել է գետնին: Վահեն ու Դավիթը «գիտակցելով, որ հասել են իրենց ցանկացած հետևանքին», իջել են տանիքից, Շուշանիկ Գ.-ի տնից հափշտակել են շուրջ 300 հազար դրամ արժողությամբ ոսկե շղթա, մարգարտե քարով ոսկե ականջօղեր, ոսկե մատանի: Ավարը վերցնելով՝ նրանք տանից դուրս են եկել ու տեսել, որ Շուշանիկ Գ.-ն իջնում է տանիքից և օգնություն է կանչում: Վահեն, ըստ դատական ակտի, մոտեցել է կնոջը, տան մուտքի դռան մոտից վերցրել է աղյուսե սալիկ ու հարվածել է Շուշանիկի գլխին: Նրան քաշքշելով տարել է տուն, որտեղ անգիտակից կնոջը գցել է ննջասենյակի մուտքի դռան մոտ: Այդտեղ Վահեն, ըստ դատական ակտի, մատներով սեղմել է Շուշանիկի պարանոցը, շնչահեղձ անելու եղանակով սպանել է նրան: Ապա զանգահարել է Շուշանիկի՝ ՌԴ-ում գտնվող հարազատներին ու ասել է, թե Շուշանիկը տանիքում հոսանքահարվելով՝ մահացել է: Դավիթը, ըստ դատական ակտի, հանցագործության գործիքները՝ պարանը, մետաղե խողովակը, աղյուսե սալիկը թաքցրել է տարբեր վայրերում:
Դեպքի հաջորդ օրը տղաները գնացել են տուժողի տուն՝ իբր նրա հիվանդ աղջկան «նայելու», իրականում՝ տուժողի տանը իրադարձություններին հետևելու: Այն, որ Շուշանիկը հոսանքահարվելուց չի մահացել, շուտով պարզվել է, աստիճանաբար ի հայտ է եկել նաև, թե ովքեր են կյանքից զրկել Շուշանիկին: Քննչական փորձարարության ժամանակ Դավիթ Կ.-ն ներկայացրել է, թե ինչպես է տեղի ունեցել սպանությունը…
Գյուղում Վահեին համարել են Շուշանիկի «տան տղան», քանի որ նա հաճախ է եղել այդ տանը, օգնել կամ գումարի դիմաց տարբեր աշխատանքներ է կատարել:
Վահե Գ.-ն իրեն մեղավոր է ճանաչել մեղսագրված արարքի համար, դատարանում հրաժարվել է ցուցմունքներ տալուց:
Նախաքննական ցուցմունքում նա հայտնել է, թե դեպքի օրը՝ 2016 թվականի փետրվարի 23-ին, վերադարձել է աշխատավայրից, ցանկացել է իրենց հեռուստացույցի թվայնացնող սարքը փորձարկել մեկ այլ հեռուստացույցի վրա: Ինքն ու Դավիթն անցել են Շուշանիկի տան մոտով: Վերջինս, իրենց տեսնելով, տուն է հրավիրել՝ խնդրելով նորոգել իր հեռուստացույցը: Ինքը Դավիթի ու Շուշանիկի հետ բարձրացել է տան տանիք, որտեղ փորձել է նորոգել հեռուստացույցի ալեհավաքի մալուխը: Շուշանիկն իրենց մեղադրել է հեռուստացույցը փչացնելու համար, անեծքներ է տվել, ինչից «դրդված»՝ ինքը պարանը գցել է Շուշանիկի պարանոցին, իսկ Դավիթը վերցրել է մետաղե խողովակն ու երեք անգամ հարվածել է Շուշանիկի գլխին և մեջքին: Շուշանիկն ընկել է: Իրենք իջել են տանիքից, մտել են Շուշանիկի տուն, վերջինիս հիվանդ դստերը՝ Իրմային խաբել ու ասել են, թե մայրը տանիքում հոսանքահարվել է, մեկուսիչ ժապավեն է պետք: Իրման գնացել է ժապավեն բերելու: Իրենք այդ ընթացքում տանից դուրս են եկել, տեսել են, որ Շուշանիկը աստիճաններով իջնում է տանիքից: Նրան տեսնելով՝ իրենք վախեցել են, երկուսով փախել են դեպի բակ: Շուշանիկը գոռացել է՝ Իրմա՛, գոռա, թող հարևանները հավաքվեն: Շուշանիկն ինքն էլ է սկսել օգնություն կանչել, բայց նրա ձայնը խզված էր, չէր կարողանում բարձր գոռալ: Նրան հանգստացնելու նպատակով ինքը մոտեցել, փորձել է համոզել, որ նա իրավապահներին չդիմի: Դավիթը չի մոտեցել: Երբ Շուշանիկը ցանկացել է տուն մտնել, ինքը զգացել է՝ եթե նա տուն մտնի, իրավիճակը կփոխվի, նա իրավապահներին կհայտնի, թե ինչ է եղել: Ինքը մուտքի դռան մոտից վերցրել է աղյուսե սալիկն ու դրանով հարվածել է Շուշանիկի գլխին: Վերջինս ընկել է: Ինքը բռնել է նրա կոնքերից ու ձեռքերից, տարել է տուն: Ննջասենյակի մուտքի մոտ Շուշանիկը կորցրել է գիտակցությունը: Ինքն ուժասպառ էր եղել, նրան գցել է հատակին: Շուշանիկի հիվանդ դստերը խաբել է, թե մայրը քնած է, խնդրել է նրա համար ջուր բերել: Իրմայի գնալուց հետո ինքը «աջ ձեռքի բութ մատով ու ցուցամատով կիսալուսնաձև օղ կազմած՝ սեղմել է Շուշանիկի պարանոցը, խեղդամահ է արել նրան», քանի որ վախեցել է, որ ողջ մնալու դեպքում նա կատարվածի մասին կհայտնի իրավապահներին: Մի քանի վայրկյան հետո ձեռքը թողել է, Շուշանիկը խռխռոց է արձակել: Ինքը գնացել է լվացվելու, քանի որ ձեռքերն արյունոտվել էին: Երբ վերադարձել է, Շուշանիկն արդեն մահացած էր:
Վահեն հայտնել է, թե ինքը տանիքում գտնվելու ժամանակ Դավիթին չի սպառնացել, չի պահանջել, որ նա հարվածի, ինքը միայն առաջարկել է, Դավիթն էլ վերցրել է մետաղե խողովակն ու հարվածել է Շուշանիկին… Վահեն ընդունել է, որ իր ու Դավիթի միջև իր ընկերուհու եղբոր համար երաժշտական գործիք գնելու շուրջ խոսակցություն է եղել…
Դավիթ Կ.-ն մեղսագրված արարքի համար իրեն մեղավոր է ճանաչել, դատարանում հրաժարվել է ցուցմունքներ տալուց:
Նախաքննական ցուցմունքում նա հայտնել է, թե 2016 թվականի փետրվարի 19-ին ու 20-ին Վահե Գ.-ն իրեն առաջարկել է գնալ, խեղդամահ անել Շուշանիկենց, նրանց գումարները վերցնել, քանի որ խոստացել է, որ Վարդենիսի մի բնակչից երաժշտական գործիք պիտի գնի ու տա իր ընկերուհու եղբորը… Վահեն, ըստ Դավիթի, խնդրել է օգնել ու իրեն «պադվադիտ» չանել…
Ինքը չի համաձայնել Վահեի առաջարկին, իսկ նա ասել է՝ եթե երաժշտական գործիքը տա ընկերուհու եղբորը, նա գործիքի արժեքը մաս-մաս կվճարի, իրենք գումարը կկիսեն: Բացի այդ՝ Վահեն ասել է, թե բանկային քարտ պիտի ձեռք բերի, որ ընկերուհու եղբայրն ամեն ամիս այդ քարտին 40 հազար դրամ փոխանցի: Նա մտածում էր քարտի վրա հավաքված գումարը բանակում օգտագործել…
Ըստ Դավիթի՝ 2016 թվականի փետրվարի 23-ին իրենք աշխատանքից վերադաձել, գնացել են Վահեի տուն: Վերջինս վերցրել է հեռուստացույցի թվայնացնող սարքն ու ասել է, թե այն տանելու է փորձարկելու: Իրենք հասել են Շուշանիկի տան մոտ: Վերջինս կանգնած էր պատշգամբում: Խոսել են նրա հետ, նա առաջարկել է հեռուստացույցի ալեհավաքի մալուխը նորոգել: Վահեն գործիքներ է պահանջել, իրենք բարձրացել են տանիք: Վահեն կտրել-կպցրել է մալուխը, հետո նորից քանդել է: Երբ Շուշանիկը շրջվել է, Վահեն ծոցից հանել է հակի թելերից հյուսված 4-6 տակ պարան, գցել է Շուշանիկի պարանոցին ու սկսել է խեղդել: Վահեն իրեն ասել է, որ խողովակով խփի Շուշանիկի գլխին: Ինքը չի ցանկացել դա անել: Վահեն պահանջել է, որ ինքը դա անի, սպառնացել է, թե իրեն դանակով կվնասի: Ինքը խողովակը վերցրել ու մի անգամ հարվածել է Շուշանիկի գլխին: Նա ընկել է: Ինքը վախեցել ու իջել է տանիքից, խողովակը նետել է տանը հարակից կիսակառույցի մեջ ու քայլել է դեպի ճանապարհը: Տեսել է, որ Վահեն ու Շուշանիկն իջնում են տանիքից: Վահեն աղյուս է վերցրել ու խփել է Շուշանիկի գլխին, ապա նրան գրկել ու տուն է տարել:
Հետո նա դուրս է եկել ու ասել է, որ խեղդել է Շուշանիկին: Վահեն զանգել է Շուշանիկի հարազատներին ու ասել է, թե Շուշանիկը հոսանքահարվել ու մահացել է: Ինքը դեպքից հետո Վահեի պահանջով թաքցրել է աղյուսը…
Տուժողի իրավահաջորդը՝ Շուշանիկի եղբայրը, հայտնել է, թե Շուշանիկն ուներ ամուսնուց հիշատակ մնացած մարգարտե քարով ոսկե ականջօղեր, ոսկե մատանի ու միջին հաստության ոսկե շղթա, որոնք դեպքից հետո անհետացել են: Տուժողի իրավահաջորդը նշել է նաև, որ նախկինում Վահեն գումարի դիմաց աշխատել էր Շուշանիկի հողամասում…
Դավիթ Կ.-ի մայրը հայտնել է, թե դեպքից հետո որդին եղելէ վախեցած վիճակում, չի ցանկացել խոսել կամ խոսել է կցկտուր, նրա պահվածքը շատ տարօրինակ էր… Ինքը համոզել է, որ նա պատմի ճշմարտությունը, ասել է՝ ոչինչ հնարավոր չէ թաքցնել: Դավիթը պատմել է կատարվածը…
Դավիթի մայրը նշել է՝ Վահեն խաբել, իր որդուն տարել է հանցագործության…
Վահեի ընկերուհու եղբայրը հայտնել է, թե Վահեն սիրահարված լինելով իր քրոջը, համացանցով ծանոթացել ու դիտավորյալ մտերմացել է իր հետ, ասել է, իբր հավանում է իր երաժշտությունը: Վահեն իր ծննդյան օրը եկել է իրենց տուն, իրեն թանկարժեք պլանշետ է նվիրել, ասել է, թե հարուստ ընտանիքից է, իբր՝ թանկարժեք մեքենաներ ունեն, տեխնիկա, 40 հեկտար կարտոֆիլի դաշտեր են մշակում… 2016 թվականի փետրվարի կեսին Վահեն իմացել է, որ ինքը ցանկանում է իր երաժշտական գործիքը վաճառել ու ավելի լավը՝ նոր «Կոռպեա 600» տեսակի «սինթեզատոր» գնել: Նա ասել է, թե այդ գործիքից գտել է՝ մեկը վաճառում է 1200 դոլարով, նա տվել է այդ անձի հեռախոսի համարը: Բայց իր հայրն ասել է, թե այդ գործիքը գնելու գումար չունեն: Երբ ինքն այդ մասին ասել է Վահեին, վերջինս ասել է, թե գումար կտրամադրի: Իրենք համաձայնության են եկել: Նաև խոսել են գործիքը վաճառողի հետ: Սկզբում Վահեն ասել է, թե գումարն իր բարեկամներն են տալու, ինքը հետո մաս-մաս պիտի վերադարձներ այդ գումարը Վահեին: Գործիք վաճառողը զանգել ու ասել է, թե գործիքը կարող են գնել մինչև փետրվարի 25-ը, քանի որ մեկնելու է ՌԴ: Վահեն փետրվարի 24-ին խոստացել է, թե գումարը փետրվարի 27-ին կլինի: Իրենք հասկացել են, որ Վահեի խոստումներում տարօրինակ բաներ կան, հրաժարվել են գործիքը գնելուց…
Քանի որ Վահե Գ.-ն և Դավիթ Կ.-ն հանցավոր արարքի կատարման պահին դեռ 18 տարին չէին բոլորել, անչափահաս էին, ծանր հանցանքի համար նրանք 10 տարուց ավելի ժամկետով ազատազրկվել չէին կարող:
Դատարանը Վահե Գ.-ին ու Դավիթ Կ.-ին մեղավոր է ճանաչել մեղսագրված արարքի՝ ծանրացուցիչ հանգամանքներում դիտավորյալ սպանության համար՝ ՀՀ քրեական օրենսգրքի 104 հոդվածի 2-րդ մասի 7-րդ, 8-րդ կետերով:
Վահե Գ.-ն ու Դավիթ Կ.-ն դատապարտվել են 10-ական տարի ազատազրկման: Պատժի սկիզբը երկուսի համար էլ՝ 2016 թվականի փետրվարի 26-ից:
Տուժողի իրավահաջորդի ներկայացրած քաղհայցի պահանջը բավարարվել է մասնակիորեն: Վահե Գ.-ից ու Դավիթ Կ.-ից համապարտության կարգով հօգուտ տուժողի իրավահաջորդի՝ կբռնագանձվի 1 միլիոն 300 հազար դրամ. 300 հազար դրամը՝ որպես հափշտակված գույքի արժեքի, իսկ 1 միլիոն դրամը՝ որպես տուժողի հուղարկավորության ծախսերի հատուցում:
Վահե Գ.-ից ու Դավիթ Կ.-ից համապարտության կարգով հօգուտ պետբյուջեի՝ կբռնագանձվի 906 հազար 840 դրամ՝ որպես կատարված փորձաքննությունների արժեքի հատուցում: