ORSIS ռուսական սպառազինություն արտադրող ընկերությունը դատարանի որոշմամբ հանվել է Հայաստանի մատակարարների սև ցուցակից: Այս մասին հայտնում է РИА Новости-ն՝ վկայակոչելով Հայաստանում ձեռնարկության շահերը պաշտպանող փաստաբան Ալեքսանդր Սիրունյանին:
ORSIS-ը սև ցուցակում էր ընդգրկվել, երբ Հայաստանի պաշտպանության նախարարությունը չեղարկել էր մի քանի միլիոն դոլարի ռազմատեխնիկայի մատակարարման տենդերը, որին մասնակցում էր ընկերությունը:
Ավելի ուշ Ռուսաստանի արդյունաբերության և առևտրի նախարարությունն նամակ էր հղել ՀՀ պաշտպանության նախարար Դավիթ Տոնոյանին, որում այդ որոշումը որակվել էր որպես «չպատճառաբանված»:
Այդ գործով հարուցվել էր քրեական գործ Հայաստանի քրեական օրենսգրքի 376-րդ հոդվածով («ծառայության նկատմամբ անփութություն»), որն այս պահին քննում է Հայաստանի Հատուկ քննչական ծառայությունը:
«Երևանի ընդհանուր իրավասության դատարանը բավարարել է մեր միջնորդությունը և կասեցրել Հայաստանի ֆինանսների նախարարության որոշումը՝ ORSIS-ը ներառելու պետական գնումներին մասնակցելու իրավունք չունեցող սուբյեկտների սև ցուցակում»,- ասել է Սիրունյանը՝ հավելելով, որ ORSIS կարող է կրկին մասնակցել տենդերներին: