Այսօր՝ դեկտեմբերի 10-ին, Ազգային ժողովում շարունակում է քննարկվել Սահմանադրական դատարանի մասին սահմանադրական օրենքում լրացում կատարելու մասին հարցը:
«ՀՀ պատմության մեջ առաջին անգամ ուզում ենք օրենքի մակարդակով առանձին պաշտոնատար անձանց հարկադրաբար ուղարկել թոշակի. ո՞վ չի հասկանում, որ սա իրականում կամավոր չի: Ամբողջ պետական մեքենան լծվել է այս գործին. եթե կամավոր է, թողեք մարդիկ ընտրեն»,- հայտարարեց «Բարգավաճ Հայաստան» խմբակցության պատգամավոր Գևորգ Պետրոսյանը:
Նա հարց բարձրացրեց՝ ինչո՞ւ է թիրախավորվել հենց ՍԴ-ն. «Թող այս գայթակղիչ առաջարկը տրվի այլ դատարանների ևս: Պետական մարմնից դժգոհության համար վրեժխնդիր եք լինում անձանցի՞ց. սա ի՞նչ մոտեցում է: Պարոն նախարար, հարկատուներին հարցրե՞լ եք, որ չաշխատող դատավորին ամիսը մոտ 800 հազար աշխատավարձ տրվի»:
Գևորգ Պետրոսյանն ընդգծեց՝ այս նախագիծն ուղղված է անձանց դեմ. «Որովհետև ՍԴ-ն մնացել է այն միակ անառիկ ամրոցը, որը գրավելով՝ իշխանությունը ի վիճակի է ցանկացած նախաձեռնություն կյանքի կոչել, այդ թվում՝ չարաբաստիկ Ստամբուլյան կոնվենցիան»:
Նրա խոսքով՝ փոխվարչապետ Տիգրան Ավինյանն է ասել, որ ՍԴ խնդիրն ունի քաղաքական բնույթ. «Մի երկիր, որի ՍԴ-ն ձևավորվում և պահպանվում է քաղաքական շարժառիթներով, այդ երկիրը ո՛չ ներկա ունի, ո՛չ ապագա»:
Մանրամասները՝ տեսանյութում:
