«Ինձ ի՞նչ հետաքրքիր է՝ ում անունն է շրջանառվում: Բացարձակ ինձ հետաքրքիր չէ»,- «Առաջին լրատվական»-ի հետ զրույցում այսօր այսպես արձագանքեց սպորտի և երիտասարդության հարցերի նախարար Յուրի Վարդանյանը՝ ի պատասխան մեր հարցի, թե իր պաշտոնի առթիվ շրջանառվում է ԲՀԿ-ական Գաբրիել Ղազարյանի անունը, ով այժմ ՀԱՕԿ սպորտվարչության պետն է:
«168 ժամ»-ը գրել է, որ չնայած հրապարակային հայտարարություններին՝ ԲՀԿ-ն ակտիվորեն բանակցում է կառավարության ձևավորման հարցում իր մասնակցությունն ունենալու համար, և արդեն կան առաջին պայմանավորվածությունները: ՀԱՕԿ քարտուղար Հրաչյա Ռոստոմյանը երկու օր առաջ իր մերձավոր շրջապատին ավետել է, որ սպորտի և երիտասարդության հարցերի նախարար է նշանակվելու ՀԱՕԿ սպորտվարչության պետ Գաբրիել Ղազարյանը: Ղազարյանը ոչ միայն ՀԱՕԿ աշխատակից է, այլ նաև ԲՀԿ քաղաքական խորհրդին կից գործող սպորտի հանձնաժողովի նախագահը:
168.am-ի աղբյուրներով՝ Գաբրիել Ղազարյանն արդեն հանդիպել է նորանշանակ վարչապետ Հովիկ Աբրահամյանի հետ և նրա հետ քննարկել իր ապագա նախարարական գործունեության հետ կապված հարցեր, և ըստ այդ սցենարի՝ Գաբրիել Ղազարյանը նախարար նշանակվելուց հետո կհեռացվի ԲՀԿ-ից:
Մեր հարցին՝ ասում են, որ Գաբրիել Ղազարյանն արդեն հանդիպել է վարչապետ Հովիկ Աբրահամյանի հետ, սպորտի և երիտասարդության հարցերի ներկա նախարարն այսպես արձագանքեց. «Տո ինձ հետաքրքիր չէ՝ ում հետ կհանդիպեն, ոնց, ինչ կանեն»:
Յուրի Վարդանյանից փորձեցինք ճշտել, թե իր հետագա պաշտոնավարման հարցն ինչ-որ կերպ քննարկվե՞լ է, սակայն վերջինս հրաժարվեց պատասխանել. «Ոնց ուզում եք, նենց էլ ճշտեք»: