Հայաստանում թիվ մեկ խնդիրը կադրերի ռեզերվ չունենալն է՝ այսօր լրագրողների հետ հանդիպմանը ասաց ՀԿԿ կենտկոմի առաջին քարտուղար Տաճատ Սարգսյանը, այնուհետև նշեց, որ անկախության անցած տարիներին վարչապետի պաշտոնը զբաղեցրել են 12-ը, յուրաքանչյուր վարչապետ ընդամենը մեկ տարի է պաշտոնավարել:
«Ինչ է նշանակում ընդամենը մեկ տարի աշխատել. այդ ընթացքում ղեկավարը անգամ չի հասցնում ծանոթանալ կադրերին, ում հետ աշխատելու է, տիրապետել համապատասխան կազմակերպություններին: Կարծում եմ՝ թիվ մեկ խնդիրը կադրերի ռեզերվ չունենալն է: Երբ մենք ուսումնասիրում ենք վարչապետների անցած ուղին, տեսնում ենք, որ նրանցից մեկ-երկուսից բացի, մյուսները ունակ չեն ղեկավարել տնտեսություն: Հիմա նմանվում ենք այն տանտիրոջը, ղեկավարին, որ ամբողջ տունը, կահ-կարասին վաճառում է, ամենավերջում տունն է վաճառում ու վարձով ապրում: Ամեն ինչ վաճառել ենք՝ երկաթուղին, էներգիան, գազը, հեռուստատեսությունը, ջուրը, ամեն ինչ, այսօր մեր իշխանությունները կարծես թե վարձել են հանրապետությունը և ապրում են դրա մեջ»,- ասաց նա:
Սարգսյանի խոսքով՝ արդարացում չունի ՕԵԿ-ի պահվածքը, քանի որ անհասկանալի է՝ ինչ է նշանակում լինել կոալիցիայի կազմում, զբաղեցնել նախարարների պաշտոն, և մեկ օրվա ընթացքում շրջվել, դուրս գալ այդ կոալիցիայից, փոխել գաղափարախոսությունը, պետք է ոչ թե առաջնորդվել միայն կուսակցական պատկանելությամբ, այլ մասնագիտական որակներով: Թե ինչպես կաշխատի նոր վարչապետը, ըստ Սարգսյանի, այսօր ոչ մեկը չի կարող ասել. այդ հարցին կկարողանա պատասխանել, երբ վարչապետը ներկայացնի ծրագիրը:
Սարգսյանը համոզված է՝ Մաքսային միություն մտնելով՝ մենք պաշտպանում ենք մեր ինքնուրույնությունը, գերբը, զինանշանը, ամեն ինչը, նոր տնտեսական կապեր ենք ստեղծում, ավելի հզոր, ավելի պաշտպանված ենք զգում:
«Սահմանադրական բարեփոխումները ժամանակավրեպ են, չեն բխում ժողովրդի շահերից, նախ պետք է հնարավորություններն օգտագործեն, տնտեսությունը վերականգնեն, դուրս գանք արտասահմանյան շուկա: Մենք չենք ասում, որ Մաքսային միություն մտնելով՝ Եվրոպայի հետ չենք հարաբերվելու»,- ասաց նա:
Լուսանկարը՝ Armenpress-ի
