Վերջին տարիներին Հայաստանի դիվանագիտական կորպուսը բացառապես անհաջողություններ է արձանագրում:
Այս ընթացքում ՀՀ արտգործնախարար Էդվարդ Նալբանդյանը հասցրեց հօդս ցնդեցնել իր անձի շուրջ ստեղծված այն միֆը, թե իբևրնա մեծ դիվանագետ է: Խնդիրը, սակայն, միայն Նալբանդյանը չէ: Վերջին տարիներին ՀՀ դիպկորպուսը համալրվում է անձանցով, ովքեր դիվանագիտության հետ որևէ կապ չունեն: Ովքե՞ր են մեր դեսպանները, ինչո՞վ են նրանք իրականում զբաղված այլ երկրներում, ինչո՞ւ է Սերժ Սարգսյանը հենց նրանց նախընտրում:
Մուրադ Մուրադյան (ԲԱՄՕ-ի Մուրադ)։ Հայտնի այս շինարարին Սերժ Սարգսյանն անցյալ տարվա աշնանը նշանակեց Իրաքում Հայաստանի արտակարգ և լիազոր դեսպան: Ծնվել է Գեղարքունիքի մարզի Ծովինար գյուղում, ավարտել գյուղատնտեսական ինստիտուտը, այնուհետև Ռուսաստանում հիմնադրել ԲԱՄՕ ընկերությունը և սկսել շինարարական գործունեություն ծավալել ՌԴ-ում: Ինչո՞ւ Սերժ Սարգսյանը ԲԱՄՕ-ի Մուրադին արտակարգ և լիազոր դեսպանի կոչում շնորհեց և ուղարկեց Իրաք, ի՞նչ է անում այս անձը այնտեղ:
Անդրանիկ Մանուկյան (Սերվիսի Անդո), Ուկրաինայում ՀՀ արտակարգ և լիազոր դեսպան։ Ծնվել է Հրազդանի Աղավնաձոր գյուղում, ավարտել է ժողտնտեսության ինստիտուտը, այնուհետև Սանկտ Պետերբուրգի ֆինանսա-տնտեսագիտական ինստիտուտը: Աշխատել է Հրազդանի ցեմենտի գործարանում՝ որպես բանվոր, ՀՀԿ Երևանի քաղաքային կոմիտեում՝ հրահանգիչ, «Հայավտովազ» տեխսպասարկում առևտրաարդյունաբերական ֆիրմայում՝ գլխավոր տնօրեն: Այնուհետև դարձել է Աժ պատգամավոր, կառավարության աշխատակազմի ղեկավար-նախարար, պետեկամուտների նախարար, տրանսպորտի և կապի նախարար, Սերժ Սարգսյանի խորհրդական: Այդ ընթացքում Անդրանիկ Մանուկյանը հասցրեց Երևանում կառուցել «Մետրոպոլ» հյուրանոցը, «Մետրոպոլի» հետևի շենքը, որտեղ այժմ տեղակայված «Վիվասելը» և այլն: Մի խոսքով, Մանուկյանը ևս ակտիվորեն զբաղված էր շինարարական բիզնեսով:
Օլեգ Եսայան (ԼՂՀ Աժ նախկին նախագահ), ՌԴ-ում ՀՀ արտակարգ և լիազոր դեսպան։ Ծնվել է ԼՂՀ Մարտունու շրջանի Սոս գյուղում, ավարտել է ԵՊՀ տնտեսագիտական ֆակուլտետը, աշխատել ԼՂՀ Մարտունու շրջանի գործադիր կոմիտեում, եղել է ԼՂՀ երկրորդ և երրորդ գումարման Աժ նախագահը, հետագայում նշանակվել ՀՀ արժեթղթերի պետական հանձնաժողովի նախագահ: Սրանից հետո՝ 2006-ի հունիսից սկսվեց Օլեգ Եսայանի դիվանագիտական կարիերան, նա, նախ, Ռոբերտ Քոչարյանի կողմից նշանակվեց Բելառուսում ՀՀ արտակարգ և լիազոր դեսպան, իսկ արդեն 2010-ի հունվարին Սերժ Սարգսյանը նրան նշանակեց ՌԴ-ում ՀՀ արտակարգ և լիազոր դեսպան:
Հովհաննես Մանուկյան, Վրաստանում ՀՀ արտակարգ և լիազոր դեսպան։ Ծնվել է Գյումրիում, ավարտել ԵՊՀ իրավաբանական ֆակուլտետը, աշխատել ՀՀ ԳԽ քարտուղարի օգնական, եղել է ԿԸՀ անդամ, դատավոր, ՀՀ տնտեսական գործերով վերաքննիչ դատարանի նախագահ, ՀՀ վճռաբեկ դատարանի նախագահ: Նրա կենսագրության մեջ նշվում է, որ նաև լավ խոհարար է, համով ուտեստներ է պատրասւրում:
Վլադիմիր Բադալյան (Աժ պատգամավոր Աշոտ Աղաբաբյանի՝ Բուռնաշի և Աերժ Սարգսյանի աշխատակազմի ղեկավար Կարեն Կարապետյանի մտերիմն է), Թուրքմենստանում ՀՀ արտակարգ և լիազոր դեսպան։ Ծնվել է Երևանում, ավարտել պոլիտեխնիկական ինստիտուտը, մասնագիտությամբ ճարտարագետ-հարստացնող է: Աշխատել է Ղազախստանի լեռնամետալուրգիական գործարան-գիտաարտադրական միավորումում վարպետ, ճարտարագետ, «Հրազդան» մարզահամալիրի տնօրեն: Նա ավելի շատ հայտնի էր որպես «Հրազդան» տոնավաճառի տնօրեն: Այնուհետև դարձել է Աժ պատգամավոր, ՀՀԿ անդամ է: Նրան ևս արտակարգ և լիազոր դեսպանի կոչում է շնորհել Սերժ Սարգսյանը:
Արմեն Խաչատրյան (Աժ նախկին նախագահ), Բելառուսում ՀՀ արտակարգ և լիազոր դեսպան։ Ծնվել է Երևանում, ավարտել Խ. Աբովյանի անվան մանկավարժական ինստիտուտի բանասիրական ֆակուլտետը: Աշխատել է Ձորաղբյուրի միջնակարգ դպրոցում որպես հայոց լեզվի և գրականության ուսուցիչ, ՀԿԿ Շահումյանի շրջկոմի հրահանգիչ, Երևանի թիվ 191 դպրոցի տնօրեն, հոր հետ հիմնադրել է «Հրաչյա Աճառյան» համալսարանը և դարձել սույն բուհի պրոռեկտոր, այնուհետև Աժ պատգամավոր և Աժ նախագահ: Խիստ ուշագրավ մի դետալ ևս. Խաչատրյանի կենսագրական տվյալների մեջ նշված է, որ նրա կենսագրական տվյալները զետեղված են «Նշանավոր մարդիկ» համաշխարհային հանրագիտարանում, և նա ԱՄՆ կենսագրական ինստիտուտի կողմից ճանաչվել է «Տարվա մարդ»: Արմեն Խաչատրյանին արտակարգ և լիազոր դեսպանի կոչում շնորհեց Ռոբերտ Քոչարյանը՝ նշանակելով Ուկրաինայում ՀՀ դեսպան, այնուհետև Սերժ Սարգսյանը Խաչատրյանին ուղարկեց Բելառուս՝ փոխարենը նշանակելով Անդրանիկ Մանուկյանին:
Հ.Գ. ՀՀ-ում Մեծ Բրիտանիայի և Հյուսիսային Իռլանդիայի թագավորության դեսպան Չարլզ Լոնս Դեյլը 20-ամյա դիվանագիտական փորձ ունի և տիրապետում է 4 լեզուների: ՀՀ-ում Գերմանիայի Դաշնային Հանրապետության դեսպան Հանս-Յոհանն Շմիդթը գրեթե 30-ամյա դիվանագիտան կան փորձ ունի: ՀՀ-ում Լեհաստանի դեսպան Զդիսլավ Ռաչինսկին ավելի քան տասնամյա դիվանագիտական փորձ ունի: ՀՀ-ում Հունաստանի դեսպան Իոաննիս Կորինթիոսը 35-ամյա դիվանագիտական փորձ ունի: Նրանք բոլորն անցել են դիվանագիտական լուրջ դպրոց, մասնագիտությամբ դիվանագետ են, տիրապետում են մի քանի լեզուների:
