Ֆրանսիայի նախագահ Ֆրանսուա Օլանդը ստիպված է եղել սկանդալի պատճառով պաշտոնաթող անել իր խորհրդականներից մեկին, գրում է ITAR-TASS-ը:
Խոսքը Ակիլինո Մորելի մասին է, որը Ելիսեյան պալատում գլխավորում էր հասարակայնության հետ կապերի վարչությունը: Նա 2012 թ. ընտրություններին Օլանդի աջ ձեռքն էր և պատասխանատու էր նրա նախընտրական արշավի համար: Սոցիալիստների հաղթանակի արդյունքում նախագահի աշխատակազմ տեղափոխվելուց հետո Մորելը զբաղվել է նաև երկրի ղեկավարի պաշտոնական ելույթների տեքստերով:
«Մեդիաապարատ» գործակալությունը, որը լրագրողական հետաքննություն է անցկացրել, պարզել է, որ Օլանդի խորհրդականը մինչև Ելիսեյան պալատ գալը 2000-ականներին Ֆրանսիայի առողջապահության համակարգում աշխատելիս գործել է խոշորագույն դեղագործական ընկերությունների շահերից ելնելով: Նրան մեղադրել են նաև ծառայողական դիրքը անձնական նպատակներով օգտագործելու մեջ:
Վերը հիշատակված քաղաքական սկանդալները, որոնք լրջորեն վնասել են Օլանդի դիրքերին, նաև մունիցիպալ ընտրություններին սոցիալիստների տարած պարտությունը, իշխող կուսակցությունը ստիպել են նույնիսկ մինչև պաշտոնական հետաքննության սկիզբը պաշտոնից հեռացնել Մորելին: Ֆրանսիական սոցիալիստական կուսակցության ղեկավար Ժան-Քրիստոֆ Կամբադելիսը հստակ հասկացրել է, որ նախագահի խորհրդականին անձամբ ինքը և իր կուսակցության անդամները պաշտպանել չեն պատրաստվում:
